കാസർകോട്: മൊഗ്രാൽ പുത്തൂർ പഞ്ചായത്തിലെത്തിയ സ്ത്രീയെ വിഇഒ പൂട്ടിയിട്ടു. ലൈഫ് മിഷൻ പദ്ധതി പ്രകാരമുള്ള വീടിനായി പഞ്ചായത്തിൽ നൽകിയ രേഖകൾ തിരികെ ചോദിക്കാൻ എത്തിയപ്പോഴാണ് അടുക്കത്ത് ബയൽ സ്വദേശി സാവിത്രിയെ വിഇഒ ഓഫിസിനുള്ളിൽ പൂട്ടിയിട്ടത്. സംഭവത്തിൽ വിഇഒ എം അബ്‌ദുൽ നാസറിനെതിരെ കാസർകോട് ടൗൺ പൊലീസ് കേസെടുത്തു.
ഔദ്യോഗിക കൃത്യനിർവഹണം തടസപ്പെടുത്തിയെന്ന എം അബ്‌ദുൾ നാസറിന്‍റെ പരാതിയിൽ സാവിത്രിക്കെതിരെയും കേസെടുത്തിട്ടുണ്ട്. സാവിത്രിയുടെ ദയനീയ അവസ്ഥയെ കുറിച്ച് 'ഇടിവി ഭാരത്' നേരത്തെ റിപ്പോർട്ട്‌ ചെയ്‌തിരുന്നു. അടുക്കത്ത്ബയൽ കോട്ട വളപ്പിലെ മിത്രനും ഭാര്യ സാവിത്രിയും മക്കളുമാണ് ഉദ്യോഗസ്ഥരുടെ പിഴവ് കാരണം പെരുവഴിയിലായത്. വാസയോഗ്യമല്ലെങ്കിലും മറ്റു മാർഗമില്ലാത്തതിനാൽ മൺ കട്ട കൊണ്ട് നിർമിച്ച വീട്ടിൽ താമസിച്ച് വരികയായിരുന്നു സാവിത്രിയും കുടുംബവും. 2017ൽ ലൈഫ് പദ്ധതിയുടെ പട്ടികയിൽ ഉൾപ്പെട്ടതോടെ അടച്ചുറപ്പുള്ള വീട് സ്വപ്‌നം കണ്ട് ഓരോ ദിവസവും തള്ളി നീക്കി.
പഞ്ചായത്തുമായി ബന്ധപ്പെട്ട് രേഖകളും ഇവർ ഹാജരാക്കി. പിന്നാലെ പഞ്ചായത്തിൽ നിന്നും വിഇഒ എത്തി പരിശോധന നടത്തി. പഴയ വീട് പൊളിച്ചു മാറ്റാനുള്ള നിർദേശവും നൽകി. ഇതിനിടയിലാണ് പഞ്ചായത്തിൽ നിന്നും ലൈഫ് പദ്ധതി ലിസ്റ്റിൽ നിങ്ങളില്ലെന്ന അറിയിപ്പ് വന്നത്. ഉൾപ്പെട്ടത് മറ്റൊരു കുടുംബം ആണെന്നും അറിയിച്ചു. ഇതോടെ ഉദ്യോഗസ്ഥരുടെ പിഴവ് കാരണം ഈ കുടുംബം പെരുവഴിയിലാവുകയായിരുന്നു.
ആകെയുള്ള വീട് പൊളിച്ച് മാറ്റിയതോടെ ഷീറ്റ് കൊണ്ട് മറച്ച ഒറ്റ മുറി കൂരയിലായിരുന്നു പിന്നീടുള്ള താമസം. ഒരു ശുചിമുറി പോലും ഇവർക്കുണ്ടായിരുന്നില്ല. ആഹാരം പാകം ചെയ്യുന്നത് മുറ്റത്തായിരുന്നു. നിരവധി തവണ മൊഗ്രാൽ - പുത്തൂർ പഞ്ചായത്ത് അധികൃതരെ കണ്ടിട്ടും നടപടിയായില്ല. ഒടുവിൽ കലക്‌ടറെ കണ്ട് പരാതി പറഞ്ഞിട്ടും വേണ്ട പരിഗണന കിട്ടിയില്ലെന്ന് കുടുംബം പറയുന്നു.
32 വയസുള്ള ഇവരുടെ മൂത്ത മകൻ മനസിക വെല്ലുവിളി നേരിടുന്ന ആളാണ്. ഇളയ മകൻ ബുദ്ധിമാന്ദ്യം നേരിടുന്നയാളുമാണ്. ഒപ്പം അരയ്‌ക്ക് താഴെ ചനശേഷിയുമില്ല.
ഇവരെ പരിചരിക്കാൻ പോലും മിത്രനും സാവിത്രിക്കും സാധിക്കാത്ത സ്ഥിതിയാണ്. മിത്രനും ശരീരിക ബുദ്ധിമുട്ടുകൾ ഏറെയുണ്ട്. ഇതിനിടെയാണ് ഉദ്യോഗസ്ഥന്‍റെ വീഴ്‌ച കാരണം ഇങ്ങനെ ഒരു അവസ്ഥ. വീട് നിർമാണത്തിനായി വെള്ളം ലഭ്യമാക്കാൻ മകൾ പേഴ്‌സണൽ ലോൺ എടുത്തു നൽകി കുഴൽ കിണർ നിർമിച്ചതും ഇപ്പോൾ ബാധ്യതയായി മാറി.
