കോഴിക്കോട് : ലോട്ടറി കച്ചവടക്കാരായ കുടുംബത്തിൻ്റെ പക്കല്‍ നിന്ന് പണവും സ്വർണവും കവർന്ന കേസിലെ പ്രതി പിടിയില്‍. ഉണ്ണികുളം സ്വദേശിയായ അബ്‌ദുൽ ഖാദറാണ് (56) പിടിയിലായത്. പൂവാട്ടുപറമ്പിന് സമീപം മുണ്ടക്കൽ പന്നിക്കുഴിയിൽ താമസിക്കുന്ന ലോട്ടറി കച്ചവടക്കാരായ കുടുംബത്തിൻ്റെ നാല് പവൻ സ്വർണവും 1.75 ലക്ഷം രൂപയും മോഷ്‌ടിച്ചുവെന്നാണ് കേസ്.
കഴിഞ്ഞ നവംബറിലാണ് കേസിനാസ്‌പദമായ സംഭവം നടന്നത്. അംഗപരിമിതനായ പന്നിക്കുഴി റസാഖ് താമസിച്ച മുണ്ടക്കലെ വീട്ടിൽ നിന്നും മറ്റൊരിടത്തേക്ക് താമസം മാറ്റുമ്പോള്‍ സഹായത്തിന് വിളിച്ചതായിരുന്നു അബ്‌ദുൽ ഖാദറിനെ. വീട്ടിലെ സാധനങ്ങൾ മാറ്റുന്ന സമയത്ത് കവറിൽ സൂക്ഷിച്ച സ്വർണവും പണവുമായി അബ്‌ദുൽ ഖാദർ കടന്നുകളയുകയായിരുന്നു.
റസാഖ് പല തവണ അബ്‌ദുൽ ഖാദറിനെ നേരിട്ട് ബന്ധപ്പെടാൻ ശ്രമിച്ചെങ്കിലും കഴിഞ്ഞിരുന്നില്ല. പിന്നീട് ഫോണില്‍ വിളിച്ച് പരാതി നൽകുമെന്ന് പറഞ്ഞപ്പോൾ കുടുംബത്തെ ഭീഷണിപ്പെടുത്തി. തുടർന്നാണ് കുടുംബം കുന്ദമംഗലം പൊലീസിൽ പരാതി നൽകിയത്. പൊലീസ് പലതവണ ഇയാളെ ബന്ധപ്പെടാൻ ശ്രമിച്ചെങ്കിലും ഫോൺ നമ്പർ ഉപയോഗികാത്തത് വലിയ വെല്ലുവിളിയായി.
കേസ് അന്വേഷണം പുരോഗമിക്കവേയാണ് നേരത്തെ താമരശ്ശേരി ജ്വല്ലറി മോഷണക്കേസിൽ പിടിക്കപ്പെട്ട് കോഴിക്കോട് സബ് ജയിലിൽ കഴിയുന്ന രണ്ട് പ്രതികളുടെ പിതാവാണ് അബ്‌ദുൽ ഖാദർ എന്ന വിവരം പൊലീസിന് ലഭിച്ചത്. പൊലീസിന്‍റെ അന്വേഷണത്തിൽ ഇവരെ കാണാൻ അബ്‌ദുൽ ഖാദർ ജയിലിൽ എത്തുന്നതായി വിവരം ലഭിച്ചു. ചൊവ്വാഴ്‌ച വൈകുന്നേരം ജയിലിലെത്തി മക്കളെ കാണുന്നതിനിടയിലാണ് അബ്‌ദുൽ ഖാദറിനെ കുന്ദമംഗലം പൊലീസ് സ്ഥലത്തെത്തി കസ്‌റ്റഡിയിലെടുത്തത്.
അറസ്റ്റ് രേഖപ്പെടുത്തിയ പ്രതിയെ കോടതിയിൽ ഹാജരാക്കി റിമാൻഡ് ചെയ്‌തു. കുന്ദമംഗലം പൊലീസ് ഇൻസ്പെക്‌ടര്‍ എസ് ശ്രീകുമാർ, എസ് ഐ മാരായ സനീത്, ഗിരീഷ് കുമാർ ബാബുരാജ്, സന്തോഷ്‌ കുമാർ, സീനിയർ സിവിൽ പൊലീസ് ഓഫീസർമാരായ ബിജു , പ്രമോദ്, അജയൻ, സിവിൽ പൊലീസ് ഓഫീസർ ഷാജഹാൻ തുടങ്ങിയവരുടെ സംഘമാണ് പ്രതിയെ അറസ്റ്റ് ചെയ്‌തത്.
കുന്ദമംഗലത്ത് രണ്ട് കടകളിൽ മോഷണം; നാലായിരത്തോളം രൂപ കവര്‍ന്നു
കോഴിക്കോട് : കുന്ദമംഗലം-മുക്കം റോഡിൽ അടുത്തടുത്തുള്ള രണ്ട് കടകളിൽ മോഷണം. കെഎൽ ഫ്രൂട്ട്സ്, ഇ.എം വെജിറ്റബിൾസ് എന്നീ കടകളിലാണ് മോഷണം നടന്നത്. പച്ചക്കറി കടയിലെ മേശയിൽ ഉണ്ടായിരുന്ന 3000 രൂപയും ഫ്രൂട്ട്സ് കടയിലെ മേശയിൽ ഉണ്ടായിരുന്ന ആയിരത്തോളം രൂപയും മോഷണം പോയിട്ടുണ്ട്. ഇന്ന് (മാര്‍ച്ച് 21) രാവിലെ കടകൾ തുറക്കാന്‍ ഉടമകളെത്തിയപ്പോഴാണ് മോഷണം നടന്ന വിവരം അറിയുന്നത്.
പച്ചക്കറികളും പഴവർഗങ്ങളും കടയിലാകെ വലിച്ചുവാരിയിട്ട നിലയിലായിരുന്നു. പണം സൂക്ഷിക്കുന്ന മേശ വലിപ്പുകളും തുറന്നിട്ട നിലയിലായിരുന്നു. ഇരുകടകളിലെയും സിസിടിവി ദൃശ്യങ്ങൾ പരിശോധിച്ചപ്പോൾ, പുലർച്ചെ രണ്ട് നാൽപതിനാണ് മോഷണം നടന്നതെന്ന് മനസിലായി. മോഷ്‌ടാവിന്‍റെ ദൃശ്യങ്ങളും ഇരുകടകളിലെയും സിസിടിവിയിൽ പതിഞ്ഞിട്ടുണ്ട്.
കുന്ദമംഗലം പൊലീസ് സ്ഥലത്തെത്തി പരിശോധന നടത്തി. പരിസരത്തെ മറ്റ് സിസിടിവികൾ കേന്ദ്രീകരിച്ചും പൊലീസ് അന്വേഷണം നടത്തുന്നുണ്ട്. നാല് മാസം മുമ്പ് കുന്ദമംഗലത്തിന് സമീപം കാരന്തൂർ പാലക്കൽ പമ്പിനടുത്ത് പച്ചക്കറി കടയിൽ മോഷണം നടത്തിയ അതേ ആളുടെ ദൃശ്യം തന്നെയാണ് ഇന്ന് നടന്ന മോഷണത്തിലും സിസിടിവിയിൽ പതിഞ്ഞതെന്ന് വ്യക്തമായിട്ടുണ്ട്.
