അതിശക്തമായ മഴ കാരണം കുടക് റോഡുകളിൽ വാഹന നിയന്ത്രണം ഏർപ്പെടുത്തിയപ്പോൾ (ETV Bharat)
കണ്ണൂര്‍: മഴ അതിശക്തമായി തുടരുന്ന സാഹചര്യത്തില്‍ കുടകുവഴി പോകുന്ന റോഡുകളില്‍ ഭാരമുളള വാഹനങ്ങള്‍ക്ക് നിയന്ത്രണം ഏര്‍പ്പെടുത്തി. 18.5 ടണ്ണില്‍ കൂടുതൽ ഭാരമുളള ചരക്കു വാഹനങ്ങള്‍ക്കാണ് നിരോധനം നടപ്പാക്കിയിരിക്കയാണ്. മള്‍ട്ടി ആക്‌സില്‍ വിഭാഗം ഉള്‍പ്പെടെ പൊതുഗതാഗത സംവിധാനങ്ങള്‍ക്കും സ്‌കൂള്‍ വാഹനങ്ങള്‍ക്കും നിരോധനത്തില്‍ നിന്ന് ഇളവുണ്ട്.
തടി, മണല്‍ തുടങ്ങിയ ലോഡ് വാഹനങ്ങള്‍ നിരോധനത്തില്‍ ഉൾപ്പെടുന്നുണ്ട്. കുറഞ്ഞ അളവിലായാലും ഈ വിഭാഗത്തില്‍ പെടുന്ന വാഹനങ്ങള്‍ തടയപ്പെടും. കഴിഞ്ഞ ദിവസം മാക്കൂട്ടത്തിന് സമീപം ഓടക്കൊല്ലിയില്‍ ലോറി മറിഞ്ഞ് ഡ്രൈവര്‍ മരിച്ചിരുന്നു. ഈ മാസം 31 വരെയാണ് ഇപ്പോള്‍ നിരോധനം ഏര്‍പ്പെടുത്തിയതെങ്കിലും കാലവര്‍ഷം ശക്തമായി തുടരുകയാണെങ്കില്‍ നിയന്ത്രണങ്ങള്‍ നീട്ടിയേക്കും.
