തിരുവനന്തപുരം: സിപിഎം സംസ്ഥാന കമ്മിറ്റി ഓഫിസായ എകെജി സെന്‍റർ ആക്രമണ കേസിലെ രണ്ടാം പ്രതി ഡല്‍ഹിയില്‍ പിടിയില്‍. യൂത്ത് കോണ്‍ഗ്രസിന്‍റെ മുന്‍ തിരുവനന്തപുരം ജില്ല സെക്രട്ടറി സുഹൈല്‍ ഷാജഹാനാണ് ഡല്‍ഹി വിമാനത്താവളത്തില്‍ പിടിയിലായത്. 2022 ജുലൈ 1നായിരുന്നു എകെജി സെന്‍ററിന്‍റെ മതിലില്‍ സ്‌ഫോടക വസ്‌തു എറിഞ്ഞത്.
നാല് പ്രതികളുള്ള കേസില്‍ മുഖ്യ സൂത്രധാരന്‍ സുഹൈലാണെന്ന് ക്രൈം ബ്രാഞ്ച് റിപ്പോര്‍ട്ടുണ്ടായിരുന്നു. സംഭവത്തിന് പിന്നാലെ വിദേശത്തേക്ക് കടന്ന സുഹൈലിനെതിരെ പൊലീസ് ലുക്കൗട്ട് നോട്ടിസും പുറപ്പെടുവിച്ചിരുന്നു. ഡല്‍ഹി വിമാനത്താവളത്തില്‍ നിന്നു കാഠ്‌മണ്ഡുവിലേക്ക് പോകാനിരിക്കെയാണ് സുഹൈലിനെ പിടികൂടുന്നത്.
ഇന്ന് വൈകിട്ടോടെ സുഹൈലിനെ തിരുവനന്തപുരത്ത് എത്തിക്കും. ഇതിനായി അന്വേഷണ സംഘം ഡല്‍ഹിയിലേക്ക് പോകും. സംഭവത്തില്‍ നാല് പ്രതികളെ ഉള്‍പ്പെടുത്തിയായിരുന്നു കേസ് രജിസ്റ്റര്‍ ചെയ്‌തിരുന്നത്. ഇതില്‍ യൂത്ത് കോണ്‍ഗ്രസ് നേതാവും കഴക്കൂട്ടം ആറ്റിപ്ര സ്വദേശി വി ജിതിന്‍, ടി നവ്യ എന്നിവരെ പൊലീസ് നേരത്തെ തന്നെ അറസ്റ്റ് ചെയ്‌തിരുന്നു.
