തൃശൂർ: വരന്തരപ്പിള്ളി പൗണ്ടിൽ കീറി ഒട്ടിച്ച 50 രൂപ നോട്ട് സ്വീകരിക്കാത്തതിന് ബേക്കറി അടിച്ച് തകർത്തു. പൗണ്ട് സെൻ്ററിൽ പ്രവർത്തിക്കുന്ന ശങ്കര സ്‌നാക്‌സ് എന്ന കടയിലാണ് ആക്രമണം നടന്നത്. വരന്തരപ്പിള്ളി ഇല്ലിക്കൽ ജോയിയാണ് അതിക്രമം നടത്തിയ നടത്തിയതെന്ന് ബേക്കറി ഉടമ പറയുന്നു. ശനിയാഴ്‌ച (നവംബർ 30) രാത്രി എട്ട് മണിയോടെയാണ് സംഭവം.
70 രൂപയുടെ സാധനങ്ങൾ വാങ്ങിയ ആൾ നൽകിയ നോട്ടുകളിലുണ്ടായിരുന്ന 50 രൂപയുടെ നോട്ട് കീറി ഒട്ടിച്ച നിലയിലായിരുന്നു. ഇത് മാറ്റി നൽകണമെന്ന് കടയുടമ പറഞ്ഞതോടെ കുറച്ചുകഴിഞ്ഞ് വരാമെന്നു പറഞ്ഞ് വാങ്ങിയ സാധനങ്ങൾ എടുക്കാതെ ഇയാൾ മടങ്ങുകയായിരുന്നു. പിന്നീട് രണ്ടുമണിക്കൂറിന് ശേഷം മദ്യലഹരിയിൽ എത്തിയ ഇയാൾ കടയിൽ ഭീകരാന്തരീക്ഷം സൃഷ്‌ടിച്ച് ചില്ല് അലമാരകൾ തകർക്കുകയും സാധനങ്ങൾ വലിച്ചെറിയുകയും ചെയ്‌തു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
ആക്രമണ ദൃശ്യങ്ങൾ കടയിലെ നിരീക്ഷണ ക്യാമറയിൽ പതിഞ്ഞിട്ടുണ്ട്. തുടർന്ന് കടയിലെ ജീവനക്കാർ വിവരമറിയിച്ചതിനെ തുടർന്ന് സ്ഥലത്തെത്തിയ വരന്തരപ്പിള്ളി പൊലീസ് ജോയിയെ പിടികൂടിയെങ്കിലും വിട്ടയച്ചു. ഏകദേശം നാല് ലക്ഷം രൂപയുടെ നഷ്‌ടം സംഭവിച്ചതായി കടയുടമ മണ്ണുത്തി സ്വദേശി വേങ്ങത്താനത്തിൽ വിനോദ് പറഞ്ഞു.
