ബാര്‍ബഡോസ്: ടി20 ലോകകപ്പ് ഫൈനലില്‍ ദക്ഷിണാഫ്രിക്കയ്‌ക്ക് എതിരെ ഇന്ത്യയ്‌ക്ക് മികച്ച സ്‌കോര്‍. ടോസ് നേടി ആദ്യം ബാറ്റ് ചെയ്യാന്‍ ഇറങ്ങിയ ഇന്ത്യ നിശ്ചിത 20 ഓവറില്‍ 7 വിക്കറ്റ് നഷ്‌ടത്തില്‍ 176 റണ്‍സ് നേടി. നിര്‍ണായക മത്സരത്തില്‍ ഫോം കണ്ടെത്തിയ വിരാട് കോലിയുടെ അര്‍ധ സെഞ്ചുറിയാണ് ഇന്ത്യന്‍ ഇന്നിങ്‌സിന് കരുത്തായത്. 59 പന്തില്‍ ആറ് ബൗണ്ടറികളും രണ്ട് സിക്‌സും സഹിതം 76 റണ്‍സാണ് കോലി നേടിയത്. അക്‌സര്‍ പട്ടേല്‍ (31 പന്തില്‍ 47), ശിവം ദുബെ (16 പന്തില്‍ 27) എന്നിവര്‍ നിര്‍ണായക പ്രകടനം പുറത്തെടുത്തു.
മാര്‍കോ ജാന്‍സന്‍ എറിഞ്ഞ ആദ്യ ഓവറില്‍ 15 റണ്‍സ് അടിച്ചെങ്കിലും ഇന്ത്യയുടെ തുടക്കം പാളി. രണ്ടാം ഓവറില്‍ രണ്ട് വിക്കറ്റുകളാണ് ടീമിന് നഷ്‌ടമായത്. ഓപ്പണര്‍ രോഹിത് ശര്‍മയേയും (9) റിഷഭ് പന്തിനേയും (0) കേശവ് മഹാരാജാണ് തിരിച്ചയച്ചത്.
രോഹിത്തിനെ ഹെന്‍റിച്ച് ക്ലാസനും പന്തിനെ വിക്കറ്റ് കീപ്പര്‍ ക്വിന്‍റണ്‍ ഡി കോക്കും കയ്യിലൊതുക്കി. പിന്നാലെ സൂര്യകുമാര്‍ യാദവിനെ (4) കാഗിസോ റബാഡ ക്ലാസന്‍റെ കയ്യിലെത്തിച്ചതോടെ ഇന്ത്യ 4.3 ഓവറില്‍ 34/3 എന്ന നിലയിലായി. പിന്നീട് വിരാട് -അക്‌സര്‍ സഖ്യം ഇന്ത്യയ്‌ക്ക് കരുത്തായി. 72 റണ്‍സാണ് ഇരുവരും കൂട്ടിച്ചേര്‍ത്തത്. 14-ാം ഓവറില്‍ അക്‌സര്‍ റണ്ണൗട്ടായതോടെയാണ് കൂട്ടുകെട്ട് പിരിയുന്നത്.
