മുംബൈ: സമീപകാലത്ത് ഇന്ത്യൻ ക്രിക്കറ്റിലെ പ്രധാനപ്പെട്ട ചര്‍ച്ചാവിഷയങ്ങളില്‍ ഒന്നായിരുന്നു വിക്കറ്റ് കീപ്പര്‍ ബാറ്റര്‍ ഇഷാൻ കിഷൻ. കഴിഞ്ഞ ഏകദിന ലോകകപ്പില്‍ ഇന്ത്യൻ ടീമിന്‍റെ ഭാഗമായിരുന്ന താരം ഇന്ത്യയ്‌ക്ക് വേണ്ടി അവസാനമായി ഒരു മത്സരം കളിക്കാനിറങ്ങിയിട്ട് നിലവില്‍ എട്ട് മാസം പിന്നിട്ടിരിക്കുകയാണ്. ഏകദിന ലോകകപ്പിന് ശേഷം നവംബറില്‍ ഓസ്‌ട്രേലിയക്കെതിരെ നടന്ന ടി20 പരമ്പരയിലെ മൂന്നാം മത്സരത്തിലാണ് ഇഷാൻ കിഷൻ അവസാനമായി ഇന്ത്യയ്‌ക്ക് വേണ്ടി കളിച്ചത്.
ഇതിന് പിന്നാലെ ഇന്ത്യയുടെ ദക്ഷിണാഫ്രിക്കൻ പര്യടനത്തിനുള്ള സ്ക്വാഡില്‍ ഉള്‍പ്പെടുത്തിയിരുന്നെങ്കിലും സ്വകാര്യ ആവശ്യങ്ങള്‍ ചൂണ്ടിക്കാട്ടി താരം പരമ്പരയില്‍ നിന്നും ഒഴിവാകുകയായിരുന്നു. പിന്നാലെ, രഞ്ജി ട്രോഫി മത്സരങ്ങള്‍ കളിക്കാനും ഇഷാൻ കിഷൻ തയ്യാറായിരുന്നില്ല. ഇതോടെ, സെന്‍ട്രല്‍ കോണ്‍ട്രാക്‌ട് ലിസ്റ്റില്‍ നിന്നുള്‍പ്പടെ താരത്തെ ബിസിസിഐ ഒഴിവാക്കി.
പിന്നാലെ, ആഭ്യന്തര മത്സരങ്ങള്‍ കളിച്ചാല്‍ മാത്രമെ ഇഷാൻ കിഷനെ ഇന്ത്യൻ ടീമിലേക്ക് പരിഗണിക്കുകയുള്ളൂവെന്ന് മുഖ്യപരിശീലകനായ രാഹുല്‍ ദ്രാവിഡും വ്യക്തമാക്കിയിരുന്നു. എന്നാല്‍, താരം രഞ്ജി ട്രോഫി മത്സരങ്ങള്‍ കളിക്കാൻ തയ്യാറാകാതിരുന്നത് വ്യപക വിമര്‍ശനത്തിനാണ് വഴിയൊരുക്കിയത്. അന്ന് ആഭ്യന്തര മത്സരങ്ങള്‍ കളിക്കാൻ തയ്യാറാകാതിരുന്നതിന്‍റെ കാരണങ്ങള്‍ വ്യക്തമാക്കിയിരിക്കുകയാണ് ഇപ്പോള്‍ 25കാരനായ താരം.
അന്താരാഷ്‌ട്ര ക്രിക്കറ്റില്‍ നിന്നും ഇടവേളയെടുത്ത സാഹചര്യത്തില്‍ താൻ ആഭ്യന്തര മത്സരങ്ങള്‍ കളിക്കാനുള്ള മാനസികാവസ്ഥയില്‍ ആയിരുന്നില്ലെന്നാണ് ഇഷാൻ കിഷൻ പറയുന്നത്. ഇന്ത്യയിലെ ഒരു പ്രമുഖ ദേശീയ മാധ്യമത്തിന് നല്‍കിയ അഭിമുഖത്തിലാണ് താരം ഇക്കാര്യം വ്യക്തമാക്കിയിരിക്കുന്നത്. ഇഷാൻ കിഷൻ പറയുന്നതിങ്ങനെ...
'ക്രിക്കറ്റില്‍ നിന്നും ഇടവേളയെടുക്കുക എന്നത് സാധാരണമായ ഒരു കാര്യമായതുകൊണ്ടാണ് ഞാൻ അത് ചെയ്‌തത്. തിരിച്ച് ടീമിലേക്ക് വരണമെങ്കില്‍ ആഭ്യന്തര ക്രിക്കറ്റ് കളിക്കണമെന്ന് നിയമമുണ്ട്. അത് ലളിതമായ ഒരു കാര്യം തന്നെ.
എന്നാല്‍, ഞാൻ ഡൊമസ്റ്റിക് മത്സരങ്ങള്‍ കളിക്കണമെന്ന് പറയുന്നതില്‍ കാര്യമില്ല. ഒരു മത്സരങ്ങളിലും കളിക്കാനുള്ള മാനസികാവസ്ഥയില്‍ ആയിരുന്നില്ല. അതുകൊണ്ടായിരുന്നു ഇടവേളയെടുത്തത്. രാജ്യാന്തര ക്രിക്കറ്റില്‍ നിന്നും ഇടവേളയെടുക്കുന്ന ഒരു താരം തിരികെ ദേശീയ ടീമിലേക്ക് എത്താൻ ആഭ്യന്തര മത്സരങ്ങള്‍ കളിക്കണമെന്ന് പറയുന്നത് ശരിയായ കാര്യമായി തോന്നുന്നില്ല. അന്ന്, വേണമെങ്കില്‍ ഒരുപക്ഷെ എനിക്ക് ഇന്ത്യയ്‌ക്കായി കളിക്കുന്നത് തുടരാമായിരുന്നു.
എന്നെ നിരാശപ്പെടുത്തുന്ന കാര്യങ്ങളാണ് സംഭവിച്ചതെല്ലാം. എല്ലാം ശരിയായിരുന്നുവെന്നും ഞാൻ പറയാൻ ആഗ്രഹിക്കുന്നില്ല. ഇത് കടന്നുവരാൻ ഏറെ പ്രയാസപ്പെട്ടു. ഞാൻ, തരക്കേടില്ലാതെ കളിച്ചിരുന്ന സമയത്താണ് ഇതെല്ലാം സംഭവിച്ചത്.'- ഇഷാൻ കിഷൻ പറഞ്ഞു.
ദക്ഷിണാഫ്രിക്കയ്‌ക്കെതിരായ പരമ്പരയില്‍ നിന്നും രഞ്ജി ട്രോഫിയില്‍ നിന്നും വിട്ടുനിന്ന ഇഷാൻ കിഷൻ ഐപിഎല്ലില്‍ മുംബൈ ഇന്ത്യൻസിനായി കളിക്കാനിറങ്ങിയിരുന്നു. സീസണില്‍ മുംബൈയ്‌ക്കായി 14 മത്സരം കളിച്ച താരം 22.85 ശരാശരിയില്‍ 320 റണ്‍സാണ് അടിച്ചെടുത്തത്.
Also Read : ഹരാരെയില്‍ സഞ്ജു എത്തി, മൂന്നാം ടി20യില്‍ ഏത് പൊസിഷൻ...?; ടീം മാനേജ്‌മെന്‍റിന് തലവേദന
