ചെന്നൈ സൂപ്പര്‍ കിങ്സിന് 'പരിക്ക് ആശങ്ക' ; സ്റ്റാര്‍ ബാറ്റര്‍ക്ക് മെയ് വരെയുള്ള മത്സരങ്ങള്‍ നഷ്‌ടമാകും

ഇടതുകയ്യിലെ തള്ളവിരലിന് പരിക്കേറ്റ സിഎസ്‌കെ ഓപ്പണറിന് ശസ്ത്രക്രിയക്ക് ശേഷം എട്ട് ആഴ്‌ച വിശ്രമം വേണ്ടിവരുമെന്ന് റിപ്പോര്‍ട്ട്

മുംബൈ : ഐപിഎല്‍ (IPL 2024) ആവേശങ്ങളിലേക്ക് ക്രിക്കറ്റ് ലോകം കടക്കുന്നതിനിടെ നിലവിലെ ചാമ്പ്യന്മാരായ ചെന്നൈ സൂപ്പര്‍ കിങ്‌സിന് (Chennai Super Kings) ആശങ്കയായി ഓപ്പണര്‍ ഡെവോണ്‍ കോണ്‍വേയുടെ പരിക്ക് (Devon Conway Injury). ഇടത് കയ്യിലെ തള്ളവിരലിന് പരിക്കേറ്റ താരത്തിന് ഐപിഎല്ലില്‍ ഭൂരിഭാഗം മത്സരങ്ങളും നഷ്‌ടമായേക്കും. ചികിത്സയുടെ ഭാഗമായി ശസ്‌ത്രക്രിയക്ക് വിധേയനാകുന്ന താരത്തിന് എട്ട് ആഴ്‌ചയോളം വിശ്രമം വേണ്ടിവരുമെന്നാണ് സൂചന.

അടുത്തിടെ അവസാനിച്ച ന്യൂസിലന്‍ഡ് ഓസ്‌ട്രേലിയ ടി20 പരമ്പരയ്ക്കിടെയാണ് ഡെവോണ്‍ കോണ്‍വേയുടെ കൈ വിരലിന് പരിക്കേല്‍ക്കുന്നത്. ഇതേ തുടര്‍ന്ന് ഓസ്‌ട്രേലിയക്കെതിരായ ടെസ്റ്റ് പരമ്പരയിലെ ആദ്യ മത്സരത്തില്‍ താരത്തിന് കളിക്കാൻ സാധിച്ചിരുന്നില്ല. തുടര്‍ന്നുള്ള പരിശോധനകളിലാണ് താരത്തിന് ശസ്‌ത്രക്രിയ വേണ്ടിവരുമെന്ന് ടീം മെഡിക്കല്‍ സംഘം അറിയിച്ചത്. ഇതോടെ, ഓസ്‌ട്രേലിയക്കെതിരായ പരമ്പരയിലെ അവസാനത്തെയും രണ്ടാമത്തെയും ടെസ്റ്റിനുള്ള ന്യൂസിലന്‍ഡ് സ്ക്വാഡില്‍ നിന്നും കോണ്‍വേയെ ഒഴിവാക്കി, പകരം ഹെൻറി നിക്കോള്‍സിനെ ടീമില്‍ നിലനിര്‍ത്തി.

ഐപിഎല്ലില്‍ ചെന്നൈ സൂപ്പര്‍ കിങ്‌സിന്‍റെ പ്രധാന താരങ്ങളില്‍ ഒരാളാണ് ഓപ്പണിങ് ബാറ്ററായ ഡെവോണ്‍ കോണ്‍വേ. സിഎസ്‌കെ ടോപ് ഓര്‍ഡറില്‍ പ്രധാനിയാണ് താരം. കഴിഞ്ഞ സീസണില്‍ ചെന്നൈയുടെ കിരീട നേട്ടത്തില്‍ നിര്‍ണായക പങ്ക് വഹിക്കാനും കോണ്‍വേയ്‌ക്ക് സാധിച്ചിരുന്നു.

അവസാന സീസണില്‍ റണ്‍വേട്ടക്കാരില്‍ മൂന്നാം സ്ഥാനക്കാരനായിരുന്നു ന്യൂസിലന്‍ഡ് ബാറ്റര്‍. 16 മത്സരങ്ങളില്‍ നിന്നും 51.69 ശരാശരിയില്‍ 672 റണ്‍സായിരുന്നു ചെന്നൈയ്‌ക്കായി കോണ്‍വേ കഴിഞ്ഞ സീസണില്‍ അടിച്ചെടുത്തത്. ആറ് അര്‍ധസെഞ്ച്വറികളും അവസാന വര്‍ഷം അടിച്ചെടുക്കാൻ താരത്തിനായിരുന്നു. ഗുജറാത്ത് ടൈറ്റൻസിനെതിരായ ഫൈനലില്‍ 25 പന്തില്‍ 47 റണ്‍സ് അടിച്ചും കോണ്‍വേ തിളങ്ങിയിരുന്നു.

വരാനിരിക്കുന്ന ഐപിഎല്‍ പതിപ്പിന്‍റെ ആദ്യ ഘട്ടത്തില്‍ നാല് മത്സരങ്ങളാണ് ചെന്നൈ സൂപ്പര്‍ കിങ്‌സിന് കളിക്കാനുള്ളത്. മാര്‍ച്ച് 22ന് നടക്കുന്ന ഉദ്ഘാടന മത്സരത്തില്‍ റോയല്‍ ചലഞ്ചേഴ്‌സ് ബാംഗ്ലൂരിനെയാണ് അവര്‍ നേരിടുന്നത് (CSK vs RCB IPL 2024). പിന്നാലെ നാല് ദിവസത്തിന് ശേഷം ഗുജറാത്ത് ടൈറ്റൻസിനെ സിഎസ്കെ നേരിടും.

മാര്‍ച്ച് 31ന് ഡല്‍ഹി കാപിറ്റല്‍സിനെതിരെയാണ് സീസണില്‍ ചെന്നൈയുടെ മൂന്നാം മത്സരം. ആദ്യ ഘട്ടത്തിലെ അവസാന മത്സരത്തില്‍ സണ്‍റൈസേഴ്‌സ് ഹൈദരാബാദുമായി ചെന്നൈ ഏറ്റുമുട്ടും. ഏപ്രില്‍ അഞ്ചിനാണ് ഈ മത്സരം.

ഡെവോണ്‍ കോണ്‍വേയ്‌ക്ക് ഈ മത്സരങ്ങളെല്ലാം നഷ്‌ടമായേക്കുമെന്നാണ് സൂചന. കോണ്‍വേയുടെ അഭാവത്തില്‍ റിതുരാജ് ഗെയ്‌ക്‌വാദിനൊപ്പം ചെന്നൈയ്‌ക്കായി ഇന്നിങ്‌സ് ഓപ്പണ്‍ ചെയ്യുന്നത് ആരാകും എന്നാണ് ആരാധകര്‍ ഉറ്റുനോക്കുന്നത്. നിലവിലെ സാഹചര്യത്തില്‍ ചെന്നൈ സൂപ്പര്‍ കിങ്‌സ് സ്ക്വാഡില്‍ നിന്നും ഓപ്പണറായി ക്രീസിലേക്ക് എത്താൻ സാധ്യതയുള്ളത് കിവീസ് താരം രചിന്‍ രവീന്ദ്രയാണ്.