മലയാള സിനിമയിലെ നവധാര സിനിമകൾക്ക് തുടക്കം കുറിച്ച സംവിധായകൻ മോഹന്‍റെ വിയോഗം തീരാ നഷ്‌ടമെന്ന് പ്രശസ്‌ത ഛായാഗ്രാഹകൻ വേണു ഐ.എസ്.സി. മലയാള സിനിമയുടെ നാഴികക്കല്ലായ മോഹന്‍റെ വിയോഗ വാർത്ത താങ്ങാവുന്നതല്ലെന്ന് വേണു. ഇടിവി ഭാരതിൽ നിന്നും സന്ദേശം എത്തുമ്പോഴാണ് താന്‍ മരണവാർത്ത അറിയുന്നതെന്നും അദ്ദേഹം പ്രതികരിച്ചു.
'താനുമായി ഒരു ചിത്രത്തിലാണ് അദ്ദേഹം സഹകരിച്ചിട്ടുള്ളത്, 'അങ്ങനെ ഒരു അവധിക്കാലത്ത്'. വളരെ അടുത്ത സുഹൃത്തായിരുന്നു. ഇടയ്ക്കിടയ്ക്ക് വിളിക്കും. അസുഖബാധിതനായ ശേഷം കുറച്ചുനാളായി പരസ്‌പരം സംസാരിക്കാറില്ലായിരുന്നു.
ഇടിവി ഭാരതിൽ നിന്നും സന്ദേശം എത്തുമ്പോഴാണ് സത്യത്തിൽ മരണവാർത്ത അറിയുന്നത് പോലും. വലിയ ഷോക്കായി പോയി. ഒരു ചിത്രത്തിലെ സഹകരിച്ചിട്ടുള്ളൂ, എങ്കിലും ദീർഘനാൾ ഒരുമിച്ചുണ്ടായത് പോലെയുള്ള അനുഭവങ്ങളാണ് മോഹനെ കുറിച്ചുള്ള ഓർമ്മകൾ. ഈ അവസരത്തിൽ ഒന്നും ഓർക്കാൻ എന്നെക്കൊണ്ട് സാധിക്കുന്നില്ല.' -വേണു ഐ.എസ്.സി പ്രതികരിച്ചു.
കൊച്ചിയിലെ സ്വകാര്യ ആശുപത്രിയിൽ ചികിത്സയിലില്‍ ഇരിക്കവെയായിരുന്നു സംവിധായകൻ മോഹന്‍റെ അന്ത്യം. ദീർഘ നാളായി ചികിത്സയിൽ കഴിയുകയായിരുന്നു അദ്ദേഹം. കലാമൂല്യമുള്ള നിരവധി സിനിമകൾ മലയാള സിനിമയ്‌ക്ക് സമ്മാനിച്ച സംവിധായകനായിരുന്നു മോഹനൻ.
എഴുപതുകളുടെ അവസാനവും എൺപതുകളിലും മലയാള സിനിമയിൽ സംവിധായകൻ എന്ന നിലയിൽ അദ്ദേഹം ഒന്നാം സ്ഥാനത്തായിരുന്നു. സമാന്തര സിനിമകളുടെ വക്താവ് കൂടിയായിരുന്നു അദ്ദേഹം. എണ്‍പതുകളുടെ തുടക്കത്തിൽ മലയാള സിനിമയെ മാറ്റിമറിക്കുന്നതിൽ മുഖ്യ പങ്കുവഹിച്ച സംവിധായകൻ കൂടിയാണ് മോഹൻ.
ഇരിങ്ങാലക്കുട ക്രൈസ്‌റ്റ് കോളേജിലെ പഠന ശേഷം, മദ്രാസിൽ ഉപരിപഠനത്തിന് ചേര്‍ന്നപ്പോഴാണ് സിനിമയിലേക്കുള്ള അദ്ദേഹത്തിന്‍റെ വഴി തുറന്നത്. 1978ൽ പുറത്തിറങ്ങിയ 'വാടകവീട്' എന്ന സിനിമയാണ് ആദ്യമായി സംവിധാനം ചെയ്‌തത്. 2005ൽ റിലീസായ 'ദി കാമ്പസ്' ആയിരുന്നു അദ്ദേഹം ഏറ്റവും ഒടുവിലായി സംവിധാനം ചെയ്‌തത്. ഹരിഹരൻ, പി വേണു തുടങ്ങിയവരുടെ സംവിധാന സഹായിയായും പ്രവർത്തിച്ചിരുന്നു അദ്ദേഹം.
'വിടപറയും മുമ്പേ', 'ഇളക്കങ്ങൾ', 'ഇടവേള', 'ഇസബെല്ല', 'ശാലിനി എന്‍റെ കൂട്ടുകാരി', 'ആലോലം', 'അങ്ങനെ ഒരു അവധിക്കാലത്ത്', 'ഒരു കഥ ഒരു നുണക്കഥ', 'രചന', 'മംഗളം നേരുന്നു', തുടങ്ങി 23 ചിത്രങ്ങള്‍ അദ്ദേഹം സംവിധാനം ചെയ്‌തു. 'അങ്ങനെ ഒരു അവധിക്കാലത്ത്', 'മുഖം', 'ശ്രുതി', 'ആലോലം', 'വിടപറയും മുമ്പേ' എന്നീ അഞ്ചു സിനിമകൾക്ക് അദ്ദേഹം തിരക്കഥയും എഴുതിയിട്ടുണ്ട്.
Also Read: സംവിധായകൻ മോഹൻ അന്തരിച്ചു - Director Mohan passed away
