'ഒരു പ്രതിഭാസത്തിനായി തയ്യാറെടുക്കൂ'; 'കങ്കുവ' ടീസർ വരുന്നു, വമ്പൻ അപ്‌ഡേറ്റ്

സൂര്യയുടെ 'കങ്കുവ' ടീസർ റിലീസ് തീയതി പങ്കുവെച്ച് നിർമാതാക്കൾ. ശിവ സംവിധാനം ചെയ്യുന്ന ചിത്രം നിലവിൽ പോസ്റ്റ് പ്രൊഡക്ഷൻ ഘട്ടത്തിലാണ്.

തെന്നിന്ത്യയുടെ പ്രിയതാരം സൂര്യ നായകനാകുന്ന ഏറ്റവും പുതിയ ചിത്രം 'കങ്കുവ'യുടെ വമ്പൻ അപ്‌ഡേറ്റ് പുറത്ത്. നിലവിൽ പോസ്റ്റ് പ്രൊഡക്ഷൻ ജോലികൾ പുരോഗമിക്കുന്ന ഈ ചിത്രത്തിന്‍റെ ടീസർ റിലീസിനെത്തുകയായി എന്ന് അറിയിച്ചിരിക്കുകയാണ് നിർമാതാക്കൾ. മാർച്ച് 19 ന് 'കങ്കുവ' ടീസർ പുറത്തിറങ്ങുമെന്നാണ് അറിയിപ്പ്.

"ഒരു പ്രതിഭാസത്തിന് തയ്യാറെടുക്കൂ! നിങ്ങളുടെ സ്‌ക്രീനുകളെ ജ്വലിപ്പിക്കാൻ കങ്കുവ ടീസർ നാളെ വൈകുന്നേരം 4:30ന് പുറത്തുവരും''- സിനിമയുടെ പ്രൊഡക്ഷൻ ബാനർ സ്റ്റുഡിയോ ഗ്രീൻ എക്‌സിൽ കുറിച്ചു. തമിഴ് സിനിമാലോകം മാത്രമല്ല, ഇന്ത്യൻ സിനിമാപ്രേമികൾ ഒന്നടങ്കം കാത്തിരിക്കുന്ന ചിത്രമാണ് സിരുത്തൈ ശിവ സംവിധാനം ചെയ്യുന്ന 'കങ്കുവ'.

രണ്ട് വർഷമെടുത്താണ് ഈ ചിത്രത്തിന്‍റെ പ്രീ പ്രൊഡക്ഷനും ഷൂട്ടിംഗും അണിയറ പ്രവർത്തകർ പൂർത്തിയാക്കിയത്. വെട്രി പളനിസാമി ഛായാഗ്രഹണവും ദേവി ശ്രീ പ്രസാദ് സംഗീത സംവിധാനവും നിർവഹിക്കുന്ന ഈ ചിത്രം യുവി ക്രിയേഷന്‍സിന്‍റെ ബാനറില്‍ വംശി പ്രമോദും സ്‌റ്റുഡിയോ ഗ്രീനിന്‍റെ ബാനറില്‍ കെ ഇ ജ്ഞാനവേല്‍ രാജയും ചേർന്നാണ് നിർമിക്കുന്നത്. ഏതാണ്ട് 350 കോടി ബജറ്റിലാണ് 'കങ്കുവ' ഒരുങ്ങുന്നതെന്നാണ് റിപ്പോർട്ടുകൾ വ്യക്തമാക്കുന്നത്.

അതേസമയം 'കങ്കുവ'യുടെ റിലീസ് തീയതി നിർമാതാക്കൾ ഇതുവരെ പുറത്തുവിട്ടിട്ടില്ല. ഈ വർഷം തന്നെ റിലീസ് ഉണ്ടാകുമെന്നാണ് പ്രതീക്ഷിക്കുന്നത്. അടുത്തിടെയാണ് ചിത്രത്തിലെ ബോബി ഡിയോളിൻ്റെ ഫസ്റ്റ് ലുക്ക് പോസ്റ്റർ പുറത്തുവന്നത്.

'കങ്കുവ'യിൽ ഉധിരൻ എന്ന പ്രതിനായക കഥാപാത്രത്തെയാണ് ബോബി ഡിയോൾ അവതരിപ്പിക്കുന്നത്. ബോബി ഡിയോളിന്‍റെ 55-ാം ജന്മദിനത്തോടനുബന്ധിച്ചായിരുന്നു, ഏറെ നാളത്തെ സസ്‌പെൻസ് അവസാനിപ്പിച്ച് ഫസ്റ്റ് ലുക്ക് അണിയറ പ്രവർത്തകർ പുറത്തുവിട്ടത്. തമിഴ് സിനിമയിലേക്കുള്ള ബോബി ഡിയോളിന്‍റെ അരങ്ങേറ്റം കൂടിയാണ് 'കങ്കുവ'യിലൂടെ സാധ്യമാകുന്നത്.

സൂര്യയുടെ 42-ാമത്തെ ചിത്രം കൂടിയാണ് പീരിയോഡിക് ത്രീഡി ചിത്രമായ 'കങ്കുവ'. 38 ഭാഷകളിൽ ആഗോള റിലീസുമായി ചരിത്രം സൃഷ്‌ടിക്കാനൊരുങ്ങുന്ന 'കങ്കുവ' 3ഡി, ഐമാക്‌സ് ഫോർമാറ്റുകളിലാണ് പ്രേക്ഷകരിലേക്കെത്തുക. വിഎഫ്‌ക്‌സ്, സിജിഐ (VFX, CGI) എന്നിവയ്‌ക്കും ഏറെ പ്രാധാന്യം നൽകിക്കൊണ്ടാണ് ഈ ചിത്രത്തിന്‍റെ നിർമാണം.

ബോളിവുഡ് താരം ദിഷ പടാനിയും ഈ ചിത്രത്തിൽ പ്രധാന വേഷത്തിലുണ്ട്. 'കങ്കുവ'യ്‌ക്കായി തിരക്കഥ ഒരുക്കിയത് ആദി നാരായണയാണ്. സംഭാഷണം മദൻ കർക്കിയും എഴുതിയിരിക്കുന്നു.

നിഷാദ് യൂസഫാണ് 'കങ്കുവ'യുടെ എഡിറ്റിങ് നിര്‍വഹിക്കുന്നത്. സുപ്രീം സുന്ദറാണ് ആക്ഷനും ഏറെ പ്രാധാന്യമുള്ള ഈ ചിത്രത്തിന്‍റെ സംഘട്ടന സംവിധായകൻ. ഗാനരചന - വിവേക, മദൻ കർക്കി. ആമസോണ്‍ പ്രൈം വീഡിയോ ആണ് 'കങ്കുവ'യുടെ ഒടിടി റൈറ്റ്‌സ്‌ നേടിയിരിക്കുന്നത്.