ഹൈദരാബാദ് : ഏറെ ആരാധകരുള്ള പ്രശസ്‌ത ചലച്ചിത്ര സംവിധായകനും നിര്‍മാതാവുമാണ് കരണ്‍ ജോഹർ. തന്‍റെ വിശേഷങ്ങളെല്ലാം അദ്ദേഹം സോഷ്യൽ മീഡിയ വഴി ആരാധകരുമായി പങ്കുവയ്‌ക്കാറുണ്ട്. ലണ്ടനിലെ തെരുവുകളിലൂടെ നടക്കുമ്പോൾ തനിക്ക് നേരിടേണ്ടി വന്ന ഒരു നർമ്മാനുഭവത്തെക്കുറിച്ചാണ് അദ്ദേഹം ഇപ്പോൾ പങ്കുവച്ചിരിക്കുന്നത്. ഒരു രസകരമായ വീഡിയോയും അദ്ദേഹം പങ്കിട്ടിട്ടുണ്ട്.
ലണ്ടനിലെ തെരുവിലൂടെ നടന്നുപോകുമ്പോൾ സെയ്ൻ എന്നു പേരുള്ള കണ്ടന്‍റ് ക്രിയേറ്റർ ജോഹറിനെ കണ്ടുമുട്ടുകയും അദ്ദേഹത്തോട് സംസാരിക്കാൻ ശ്രമിക്കുകയും ചെയ്‌തു. എന്നാൽ അദ്ദേഹത്തെ എങ്ങനെ അഭിസംബോധന ചെയ്യണമെന്ന് സെയ്ൻ ആലോചിക്കുന്നത് വീഡിയോയിൽ കാണാം.
കരൺ, കരൺ ജോഹർ, മിസ്റ്റർ കരൺ, മിസ്റ്റർ ജോഹർ എന്നിവയുൾപ്പെടെയുള്ള വിവിധ ഓപ്ഷനുകൾ അദ്ദേഹം പരിഗണിക്കുന്നു. എന്നാൽ കാണികളെ രസിപ്പിക്കാൻ വേണ്ടി സെയ്ൻ അദ്ദേഹത്തെ 'അങ്കിൾ' എന്ന് വിളിക്കാൻ തീരുമാനിച്ചു. അത്തരമൊരു രീതിയിൽ അഭിസംബോധന ചെയ്യപ്പെട്ടപ്പോഴുള്ള കരണ്‍ ജോഹറിന്‍റെ യഥാർഥ പ്രതികരണം വീഡിയോ പകർത്തുകയും ചെയ്‌തു.
അപ്രതീക്ഷിതമായ വാക്ക് തെരഞ്ഞെടുത്തതിൽ അദ്ദേഹത്തിന്‍റെ ആശ്ചര്യവും പ്രകോപനത്തിന്‍റെ സൂചനയും വീഡിയോയിൽ കാണാം. 'അങ്കിൾ' എന്ന് വിളിച്ചതിന്‍റെ ആദ്യ ഞെട്ടൽ ഉണ്ടായിരുന്നിട്ടും, കരണ്‍ ജോഹർ അതിനെ അഭിനന്ദിച്ചു. അദ്ദേഹം പിന്നീട് തന്‍റെ ഇൻസ്റ്റഗ്രാം സ്റ്റോറിയിൽ വീഡിയോ റീപോസ്റ്റ് ചെയ്‌തു, "സെയ്ൻ നിങ്ങളെ കണ്ടുമുട്ടിയതിൽ സന്തോഷമുണ്ട്!" എന്ന് പറഞ്ഞുകൊണ്ടാണ് അദ്ദേഹം വീഡിയോ പങ്കുവച്ചത്.
