ബോബി ഗ്രൂപ്പ് ഉടമ ബോബി ചെമ്മണ്ണൂരിനെതിരെ പരാതി നല്‍കി നടി ഹണി റോസ്. ഇക്കാര്യം നടി തന്‍റെ ഫേസ്‌ബുക്ക് പേജിലൂടെയാണ് അറിയിച്ചത്. താങ്കള്‍ തുടര്‍ച്ചയായി നടത്തിയ അശ്ലീല അധിക്ഷേപങ്ങള്‍ക്കെതിരെ താന്‍ പൊലീസില്‍ പരാതി കൊടുത്തിട്ടുണ്ടെന്നായിരുന്നു ഹണി റോസിന്‍റെ പ്രതികരണം.
"ബോബി ചെമ്മണ്ണൂര്‍, താങ്കള്‍ എനിക്കെതിരെ തുടര്‍ച്ചയായി നടത്തിയ അശ്ലീല അധിക്ഷേപങ്ങള്‍ക്കെതിരെ ഞാന്‍ എറണാകുളം സെന്‍ട്രല്‍ പൊലീസ് സ്‌റ്റേഷനില്‍ പരാതി കൊടുത്തിട്ടുണ്ട്. താങ്കളുടെ തന്നെ മാനസിക നിലയുള്ള താങ്കളുടെ കൂട്ടാളികള്‍ക്കെതിരെയുള്ള പരാതികള്‍ പുറകെ ഉണ്ടാവും. താങ്കള്‍ താങ്കളുടെ പണത്തിന്‍റെ ഹുങ്കില്‍ വിശ്വസിക്കൂ, ഞാന്‍ ഭാരത്തിലെ നിയമവ്യവസ്ഥയുടെ ശക്‌തിയില്‍ വിശ്വസിക്കുന്നു." -ഹണി റോസ് കുറിച്ചു.
എറണാകുളം സെന്‍ട്രല്‍ സ്‌റ്റേഷനിലാണ് ഹണി റോസ് പരാതി നല്‍കിയത്. പരാതിയില്‍ സെന്‍ട്രല്‍ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്. ലൈംഗികച്ചുവയോടെയുള്ള അശ്ലീല ഭാഷണത്തിനെതിരെ 75(4) വകുപ്പ് പ്രകാരവും ഇലക്‌ട്രോണിക് മാധ്യമത്തിലൂടെ അശ്ലീല പരാമര്‍ശം നടത്തുന്നതിനെതിരെ ഐടി ആക്‌ടിലെ 67 വകുപ്പ് പ്രകാരവുമാണ് കേസ് രജിസ്‌റ്റര്‍ ചെയ്‌തത്.
അതേസമയം വിഷയത്തില്‍ ബോബി ചെമ്മണ്ണൂര്‍ ഇടിവി ഭാരതിനോട് പ്രതികരിച്ചു. "തന്‍റെ ഭാഗത്ത് നിന്നും തെറ്റ് സംഭവിച്ചിട്ടുണ്ടെങ്കില്‍ ഞാനതില്‍ മാപ്പു ചേദിക്കുന്നു," -ഇപ്രകാരം ഒറ്റ വാചകത്തിലാണ് ബോബി ചെമ്മണ്ണൂര്‍ പ്രതികരിച്ചത്. അതേസമയം മറ്റ് കാര്യങ്ങളില്‍ പ്രതികരിക്കാന്‍ ബോബി ചെമ്മന്നൂര്‍ തയ്യാറായില്ല.
തന്‍റെ സ്ത്രീത്വത്തെ ഒരാള്‍ നിരന്തരം അപമാനിക്കുന്നുവെന്ന് കുറിച്ച് കൊണ്ട് ബോബി ചെമ്മണ്ണൂരിന്‍റെ പേര് പരാമര്‍ശിക്കാതെ അടുത്തിടെയാണ് ഹണി റോസ് ഫേസ്‌ബുക്കില്‍ ഒരു പോസ്‌റ്റ് പങ്കുവച്ചത്.
"നമസ്‌കാരം... ഒരു വ്യക്‌തി ദ്വയാർത്ഥപ്രയോഗങ്ങളിലൂടെ മനപ്പൂർവം തുടർച്ചയായി പിന്നാലെ നടന്ന് അപമാനിക്കാൻ ശ്രമിക്കുമ്പോഴും പ്രതികരിക്കാത്തത് അത്തരം സ്‌റ്റേറ്റ്‌മെന്‍റ്‌സ് ആസ്വദിക്കുന്നത് കൊണ്ടാണോ അതോ പറയുന്നതെല്ലാം അംഗീകരിക്കുന്നത് കൊണ്ടാണോ എന്ന് അടുപ്പം ഉള്ളവർ ചോദിക്കുന്നു.
പ്രസ്‌തുത വ്യക്‌തി പിന്നീടും ചടങ്ങുകൾക്ക് എന്നെ ക്ഷണിച്ചപ്പോൾ ഞാൻ പോകാൻ വിസമ്മതം പ്രകടിപ്പിച്ചതിന് പ്രതികാരമെന്നോണം ഞാൻ പോകുന്ന ചടങ്ങുകളിൽ മനപ്പൂർവം വരാൻ ശ്രമിക്കുകയും കഴിയുന്ന ഇടത്തെല്ലാം സ്ത്രീത്വത്തെ അപമാനിക്കുന്ന രീതിയിൽ എന്‍റെ പേര് മാധ്യമങ്ങളിലൂടെ പറയുകയും ചെയ്യുന്നു.
പണത്തിന്‍റെ ധാർഷ്ട്യത്താൽ ഏതു സ്ത്രീയെയും ഒരാൾക്ക്‌ അപമാനിക്കാൻ കഴിയുമോ, അതിനെ എതിർക്കാൻ ഇന്ത്യയിലെ നിയമസംവിധാനം ഒരു സംരക്ഷണവും നൽകുന്നില്ലേ എന്ന് ചോദിച്ചാൽ ഇയാളുടെ പ്രവർത്തികളിൽ ഇന്ത്യൻ ശിക്ഷാനിയമത്തിൽ സ്ത്രീകൾക്കെതിരെ ലൈംഗികദ്യോതകമായ (sexually coloured remarks ) ഉദ്ദേശത്തോടെ സംസാരിക്കുകയും അതേ ഉദ്ദേശത്തോടെ പിന്തുടരുകയും ചെയ്യുന്നു എന്ന കുറ്റകൃത്യങ്ങൾ പ്രഥമദൃഷ്ട്യാ നിലനിൽക്കുന്നതാണ് എന്നാണ് അറിയാൻ സാധിച്ചത്.
ഞാൻ വ്യക്‌തിപരമായി, മാനസിക വൈകൃതം ഉള്ളവരുടെ ഇത്തരം പുലമ്പലുകളെ പുച്ഛത്തോടെയും സഹതാപത്തോടെയും അവഗണിക്കാറാണ് പതിവ്, അതിന് എനിക്ക് പ്രതികരണശേഷി ഇല്ല എന്നർത്ഥം ഇല്ല. ഒരാളുടെ വ്യക്‌തി സ്വാതന്ത്ര്യത്തിന്‍റെ വ്യാഖ്യാനത്തിൽ മറ്റൊരാളുടെ വ്യക്‌തിസ്വാതന്ത്ര്യത്തെ അപമാനിക്കാനുള്ള സ്വാതന്ത്ര്യം ഇല്ല..." - ഇപ്രകാരമായിരുന്നു ഹോണി റോസിന്‍റെ ആദ്യ പോസ്‌റ്റ്.
