ബാദുഷ പ്രൊഡക്ഷൻസ് നിർമിക്കുന്ന പുതിയ ചിത്രത്തിൽ നായകനായി ബിഗ് ബോസ് ജേതാവ് ജിന്‍റോ. ബാദുഷ പ്രൊഡക്ഷൻസിന്‍റെ യൂട്യൂബ് ചാനലിലെ 'ഈഗോ ടോക്‌സ്' എന്ന ഷോയ്‌ക്ക് നൽകിയ അഭിമുഖത്തിനിടയിൽ നിർമാതാവ് ബാദുഷ തന്നെയാണ് ജിന്‍റോയുടെ നായക അരങ്ങേറ്റം പ്രഖ്യാപിച്ചത്. തിയേറ്ററുകളിലേക്കെത്താൻ ഒരുങ്ങുന്ന 'ഇന്ദിര' എന്ന ചിത്രത്തിന്‍റെ സംവിധായകൻ വിനു വിജയ് ആണ് ഈ ചിത്രം സംവിധാനം ചെയ്യുന്നത്.
ഒരു സാധാരണക്കാരന്‍റെ കഥയാണ് ചിത്രം പറയുന്നതെന്ന് നിർമാതാവായ ബാദുഷ പറഞ്ഞു. കഥയും പ്രമേയവുമാണ് തന്നെ ആകർഷിച്ചതെന്നും അദ്ദേഹം വ്യക്തമാക്കി. 'ദീപു ചന്ദ്രൻ എന്ന എഴുത്തുകാരൻ എന്നോട് വന്നു പറഞ്ഞ കഥ ഏറെ ഇഷ്‌ടപ്പെടുകയും സിനിമ നിർമിക്കാൻ തീരുമാനിക്കുകയും ആയിരുന്നു', നിർമാതാവിന്‍റെ വാക്കുകൾ ഇങ്ങനെ.
