ഓരോ വര്‍ഷവും ലാഭകരമായ ഒരു സംരംഭം തുടങ്ങണമെന്ന് ആഗ്രഹിക്കുന്നവരാണ് നമ്മളില്‍ പലരും, പ്രത്യേകിച്ച് മലയാളികള്‍. ജോലി ചെയ്യുന്നവരാണെങ്കില്‍ കൂടെ ചെറിയൊരു ബിസിനസും ആരംഭിച്ച് രക്ഷപ്പെടാമെന്ന് സ്വപ്‌നം കണ്ടു നടക്കുന്നവര്‍, എന്നാല്‍ പലര്‍ക്കും എന്ത് ബിസിനസ് തുടങ്ങിയാലാകും വിജയിക്കുക എന്നതിനെ കുറിച്ച് ധാരണയില്ല.
ഓരോ വര്‍ഷം കഴിയുംതോറും വിപണി മാറിക്കൊണ്ടിരിക്കുകയാണ്. അതുകൊണ്ടു തന്നെ സമകാലിക ബിസിനസ് ആശയങ്ങളെ കുറിച്ചുള്ള ബോധം സംരംഭകര്‍ക്ക് ഉണ്ടാകേണ്ടതുണ്ട്. കൃത്യമായ പ്ലാനിങ്ങോടെയാകണം ഓരോ ബിസിനസും ആരംഭിക്കേണ്ടത്, ഇതിന്‍റെ അഭാവം മൂലമാണ് പലരും ബിസിനസുകളില്‍ പരാജയപ്പെടുന്നത്.
'കാലത്തിനൊപ്പം കോലം മാറണം' എന്ന് പറയുംപോലെ ഓരോ കാലഘട്ടത്തിലും ബിസിനസ് ആശയങ്ങളും മാറിക്കൊണ്ടിരിക്കുകയാണ്. ഒരു സംരംഭം തുടങ്ങുന്നതിന് മുമ്പ് എല്ലാ തലങ്ങളെ കുറിച്ചും ചിന്തിക്കേണ്ടത് അത്യാവശ്യമാണ്. കാലഘട്ടത്തിന് അനുസരിച്ച് ഏറ്റവും ലാഭകരമായ ബിസിനസ് ചെയ്യുക എന്നതാണ് പ്രധാനം. ഈ ഒരു സന്ദര്‍ഭത്തില്‍ 2025ല്‍ വിജയിക്കാൻ ഏറെ സാധ്യതയുള്ള 5 ബിസിനസ് ആശയങ്ങളെ കുറിച്ച് നമുക്ക് പരിചയപ്പെടാം.
1. മുതിർന്നവർക്കുള്ള ആരോഗ്യ സേവനങ്ങൾ
പ്രായമാകുന്നവര്‍ക്ക് ആവശ്യമായ പരിചരണത്തിനുള്ള സെന്‍ററുകള്‍ ഒരു നല്ല ബിസിനസ് ആശയമാണ്. മുതിർന്നവർക്കായി ആരോഗ്യ സേവനങ്ങൾ നൽകുന്ന ബിസിനസുകൾ ലാഭകരമാണ്. ആഗോള സീനിയർ കെയർ വ്യവസായം ഗണ്യമായി വളരുമെന്നാണ് പ്രതീക്ഷിക്കുന്നത്. ഹോം ഹെൽത്ത് കെയർ, അസിസ്റ്റഡ് ലിവിങ് സൗകര്യങ്ങൾ, സ്പെഷ്യലൈസ്‌ഡ് സീനിയർ കെയർ സെന്‍ററുകൾ തുടങ്ങിയ സേവനങ്ങൾക്ക് ആവശ്യക്കാരേറെയാണ്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
എന്തുകൊണ്ട് ഇത് ലാഭകരം?
പല മുതിർന്നവരും തങ്ങൾക്ക് കഴിയുന്ന കാലം വരെ വീട്ടിൽ തന്നെ തുടരാൻ ആഗ്രഹിക്കുന്നു, അതുകൊണ്ട് തന്നെ ഹോം കെയർ സേവനങ്ങൾക്ക് വലിയ അവസരങ്ങൾ സൃഷ്‌ടിക്കുന്നു. ഡിമെൻഷ്യ പരിചരണം പോലുള്ള പ്രത്യേക പരിചരണം ആവശ്യമുള്ളവര്‍ക്ക് ഇത്തരം ഹോം കെയര്‍ സേവനങ്ങള്‍ ലഭ്യമാക്കാം. അതുകൊണ്ട് തന്നെ ഭാവിയില്‍ ഇത്തരം ബിസിനസ് വഴി സംരംഭകര്‍ക്ക് നല്ലൊരു ലാഭം നേടാനും സാധിക്കും
എങ്ങനെ തുടങ്ങാം?
കുറഞ്ഞ ചെലവിൽ നിങ്ങൾക്ക് ഒരു ഹോം ഹെൽത്ത് കെയർ ബിസിനസ് ആരംഭിക്കാം. ഇതിന് ബന്ധപ്പെട്ട അധികാരികളില്‍ നിന്നും ലൈസൻസ് ആവശ്യമാണ്. ആദ്യം കുറച്ച് ക്ലെയിന്‍റുകൾ വഴി ചെറിയ രീതിയിൽ ബിസിനസ് ആരംഭിച്ച് കാലക്രമേണ നിങ്ങളുടെ സംരംഭം വളര്‍ത്തിയെടുക്കാൻ സാധിക്കും.
2. സുസ്ഥിരമായ ഉൽപ്പന്നങ്ങളും സേവനങ്ങളും
സുസ്ഥിരമായ ഉള്‍പ്പന്നങ്ങള്‍ക്കും സേവനങ്ങള്‍ക്കും ഉപഭോക്താക്കൾ ഏറെയാണ്. മനുഷ്യന്‍റെ നിലനില്‍പ്പിനെ തന്നെ സ്വാധീനിക്കുന്ന പരിസ്ഥിതിയെ സംരക്ഷിക്കേണ്ട കടമ നമ്മള്‍ക്ക് ഓരോരുത്തര്‍ക്കുമുണ്ട്. പരിസ്ഥിതിയെ ഏറെ മലിനമാക്കുന്ന ഈ കാലഘട്ടത്തില്‍ പരിസ്ഥിതി സൗഹാര്‍ദ ഉല്‍പ്പന്നങ്ങളും സേവനങ്ങളും ആരംഭിക്കുന്നത് സംരംഭക വിപണിയില്‍ പുതിയ വാതില്‍ തുറക്കുന്നു. 2025ല്‍ പരിസ്ഥിതി സൗഹൃദ ഉല്‍പ്പന്നങ്ങള്‍ വലിയ സാധ്യതയുണ്ടെന്നാണ് വിദഗ്‌ധര്‍ വിലയിരുത്തുന്നത്.
ബയോഡീഗ്രേഡബിൾ പാക്കിങ് (പ്രകൃതിദത്ത വസ്‌തുക്കള്‍ ഉപയോഗിച്ച് ഉല്‍പന്നങ്ങല്‍ പാക്ക് ചെയ്യുന്ന രീതി) മുതൽ പുനരുപയോഗിക്കാവുന്ന ഊർജം ലഭ്യമാക്കുന്നത് ഉള്‍പ്പെടെ നിരവധി ബിസിനസ് സാധ്യതകളാണ് സുസ്ഥിരമായ ഉൽപ്പന്നങ്ങളും സേവനങ്ങളും നല്‍കുന്നതിലൂടെ ലഭ്യമാക്കാൻ കഴിയുക. എല്ലാ സംരംഭ മേഖലയിലും പരിസ്ഥിതി സൗഹൃദ ഉല്‍പ്പന്നങ്ങള്‍ ഉപയോഗിക്കാം. സര്‍ക്കാര്‍ അധികാരില്‍ നിന്നും വരെ പിന്തുണ ലഭിക്കുന്ന ഒരു ബിസിനസ് ആശയം കൂടിയാണിത്. ഇതില്‍ നിങ്ങളുടെ ഒരു മേഖല കണ്ടെത്തി സംരംഭം ആരംഭിക്കാം.
എന്തുകൊണ്ട് ഇത് ലാഭകരമാണ്:
ഉപഭോക്താക്കൾ, പ്രത്യേകിച്ച് യുവതലമുറ ഇഷ്‌ടപ്പെടുന്ന ഉൽപ്പന്നങ്ങൾക്ക് കൂടുതൽ പണം നൽകാൻ തയ്യാറാണ്. പാരിസ്ഥിതിക സൗഹാർദപരമായ ഉല്‍പന്നങ്ങളിലേക്ക് യുവാക്കള്‍ ഉള്‍പ്പെടെ മാറുമെന്നാണ് വിലയിരുത്തല്‍. ഫാഷൻ മുതൽ ഊർജ്ജം വരെയുള്ള വിവിധ വ്യവസായങ്ങളിൽ ഹരിത ബദലുകൾ വാഗ്‌ദാനം ചെയ്‌തുകൊണ്ട് പുതിയ ബിസിനസുകൾ ആരംഭിക്കാം.
എങ്ങനെ ഈ സംരംഭം തുടങ്ങാം?
ആദ്യം പ്രകൃതിദത്തമായ ഒരു ഉല്‍പന്നത്തിന്‍റെയോ സേവനത്തിന്‍റെയോ ആവശ്യം തിരിച്ചറിയുക. ഉദാഹരണത്തിന്, ഒറ്റത്തവണ ഉപയോഗിക്കുന്ന പ്ലാസ്റ്റിക് ഉൽപ്പന്നങ്ങൾക്ക് പകരം ബയോഡീഗ്രേഡബിൾ മെറ്റീരിയലുകൾ ഉപയോഗിക്കുക. ഇത്തരത്തില്‍ പ്രകൃതി സൗഹാര്‍ദ ഉല്‍പന്നങ്ങള്‍ തിരിച്ചറിഞ്ഞ് ബിസിനസ് ആരംഭിക്കുക.
3. AI (ആർട്ടിഫിഷ്യൽ ഇന്‍റലിജൻസ്) ലേണിങ് കോഴ്‌സുകളും കണ്‍സള്‍ട്ടൻസികളും
ആർട്ടിഫിഷ്യൽ ഇന്‍റലിജൻസ് (AI) ബിസിനസുകളിൽ വിപ്ലവം സൃഷ്‌ടിച്ചു കൊണ്ടിരിക്കുകയാണ്, വരും വര്‍ഷങ്ങളിലും ഇത് തുടരും. എന്നാൽ എല്ലാ കമ്പനികൾക്കും AI ഫലപ്രദമായി സമന്വയിപ്പിക്കാനുള്ള അറിവില്ല. AI സംയോജനത്തിലും ഓട്ടോമേഷനിലും വൈദഗ്ദ്ധ്യം നേടിയ കൺസൾട്ടിങ് സ്ഥാപനങ്ങൾക്ക് ഇക്കാലത്ത് ഉയർന്ന ഡിമാൻഡുണ്ട്, ബിസിനസുകളെ കാര്യക്ഷമമാക്കാനും ഉപഭോക്തൃ അനുഭവങ്ങൾ മെച്ചപ്പെടുത്താനും ഡാറ്റാധിഷ്ഠിത തീരുമാനങ്ങൾ എടുക്കാനും AI സഹായിക്കുന്നു. AIയെ കുറിച്ചുള്ള കോഴ്‌സുകളും കണ്‍സള്‍ട്ടൻസി ഏജൻസികളും തുടങ്ങുന്നത് വലിയ ബിസിനസ് സാധ്യതയാണ് തുറക്കുന്നത്.
എന്തുകൊണ്ട് ഇത് ലാഭകരമാണ്?
വരും കാലഘട്ടത്തിലും AIയുടെ സാധ്യത വര്‍ധിച്ചു കൊണ്ടേയിരിക്കുമെന്ന കാര്യം ഉറപ്പാണ്. വിദ്യാര്‍ഥികള്‍ അടക്കം AIയെ കുറിച്ച് പഠിക്കാൻ ഒരുങ്ങുന്ന കാലത്ത് ഈ സംരംഭത്തിന് ഏറെ സാധ്യതയുണ്ട്. വിദ്യാര്‍ഥികള്‍ മുതല്‍ വ്യവസായ രംഗത്തുള്ള പ്രമുഖര്‍ വരെ AI മേഖലയില്‍ പണം ചെലവഴിക്കാനും തയ്യാറാണ്.
എങ്ങനെ ഈ സംരംഭം തുടങ്ങാം?
AIയില്‍ പരിശീലനം ലഭിച്ച വിദഗ്‌ധരെ ഉപയോഗിച്ച് കണ്‍സള്‍ട്ടൻസി ആരംഭിച്ച് ഈ ബിസിനസ് ആരംഭിക്കാം. ഓണ്‍ലൈനായും AI ലേണിങ് കോഴ്‌സുകള്‍ ലഭ്യമാക്കി കൊണ്ട് സംരംഭം തുടങ്ങാവുന്നതാണ്.
4. ഡിജിറ്റല്‍ മാര്‍ക്കറ്റിങ് ഏജൻസി
ഈ ഡിജിറ്റല്‍ കാലഘട്ടത്തില്‍ ഡിജിറ്റല്‍ മാര്‍ക്കറ്റിങ് ഏജൻസികള്‍ ഒരു സുപ്രധാന പങ്കുവഹിക്കുന്നു. ഏതൊരു സംരംഭം ആരംഭിച്ചാലും അതിന്‍റെ അടിസ്ഥാന ലക്ഷ്യം കൂടുതല്‍ ഉപഭോക്താക്കളിലേക്ക് ഉല്‍പന്നങ്ങള്‍ എത്തിക്കുക എന്നതാണ്. ഇതിന് വഴിയൊരുക്കുന്നത് ഡിജിറ്റല്‍ മാര്‍ക്കറ്റിങ് ഏജൻസികളാണ്. 2025ലും ഡിജിറ്റല്‍ മാര്‍ക്കറ്റിങ് ഏജൻസികള്‍ക്ക് വലിയ ബിസിനസ് സാധ്യതയാണ് കണക്കാക്കുന്നത്.
സെർച്ച് എഞ്ചിൻ ഒപ്റ്റിമൈസേഷൻ ( SEO ) ഉപയോഗിച്ചുള്ള ഡിജിറ്റൽ മാർക്കറ്റിങ്, സെർച്ച് എഞ്ചിൻ മാർക്കറ്റിങ് (SEM), കണ്ടന്‍റ് ക്രിയേഷൻ , ഇൻഫ്ലുവൻസർ മാർക്കറ്റിങ്, കണ്ടന്‍റ് ഓട്ടോമേഷൻ, കാമ്പെയ്ൻ മാർക്കറ്റിങ്, ഡാറ്റാധിഷ്ഠിത മാർക്കറ്റിങ്, ഇ-കൊമേഴ്‌സ് മാർക്കറ്റിങ്, സോഷ്യൽ മീഡിയ മാർക്കറ്റിങ്, സോഷ്യൽ മീഡിയ ഒപ്റ്റിമൈസേഷൻ, ഇ-മെയിൽ ഡയറക്ട് മാർക്കറ്റിങ് ഉള്‍പ്പെടെ നിരവധി സാധ്യതകളാണ് ഡിജിറ്റല്‍ മാര്‍ക്കറ്റിങ് ഏജൻസി വഴി ആരംഭിക്കാൻ സാധിക്കുക.
5. വളര്‍ത്തു മൃഗങ്ങളും ആവശ്യമായ ഉല്‍പ്പന്നങ്ങളും
വളര്‍ത്തുമൃഗങ്ങളുടെ ഡിമാൻഡ് വര്‍ധിച്ച് വരുന്ന ഒരു കാലഘട്ടത്തിലാണ് നമ്മള്‍ ജീവിക്കുന്നത്. നൂതനമായ പെറ്റ് ഗ്രൂമിംഗ് സേവനങ്ങള്‍ മുതല്‍ പ്രീമിയം പെറ്റ് ഫുഡ് ഡെലിവറി വരെ നിരവധി അവസരങ്ങളാണ് ഉള്ളത്. വളർത്തുമൃഗങ്ങളുടെ ഉടമസ്ഥതയിൽ ഉണ്ടായ അഭൂതപൂർവമായ കുതിച്ചുചാട്ടം വളർത്തുമൃഗ വ്യവസായത്തെ ലോകമെമ്പാടും അതിവേഗം വളരുന്ന മേഖലയാക്കി മാറ്റിയിട്ടുണ്ട്.
നായ, പൂച്ച ഉള്‍പ്പെടെയുള്ള വളര്‍ത്തു മൃഗങ്ങളുടെ ഒരു സംരംഭം ആരംഭിക്കാം. വളർത്തുമൃഗങ്ങള്‍ക്ക് ആവശ്യമായ ഭക്ഷണം, മരുന്ന് ഉള്‍പ്പെടെ വിവിധ മേഖലകളില്‍ ബിസിനസ് ആരംഭിക്കാം. നല്ലൊരു ലൊക്കേഷൻ തെരഞ്ഞെടുത്ത് ബിസിനസ് ആരംഭിക്കുന്നതാകും ഉചിതം.
