സേലം: ശിവനും പാര്‍വതിയും വിഷ്‌ണുവും കൃഷ്‌ണനും നാഗത്താന്‍മാരുമൊക്കെയല്ലെ അമ്പലങ്ങളില്‍ സാധാരണ പ്രതിഷ്‌ഠയാവാറുള്ളത്. എന്നാല്‍ 'അന്യഗ്രഹ ദൈവം' പ്രതിഷ്‌ഠയായൊരു അമ്പലമുണ്ട്. എവിടെയാണന്നെല്ലേ ?.
തൊട്ടടുത്തു തന്നെ, നമ്മുടെ അയല്‍ സംസ്ഥാനമായ തമിഴ്‌നാട്ടിലെ സേലത്താണ് ഈ അമ്പലമുള്ളത്. ക്ഷേത്രങ്ങള്‍ കൊണ്ട് പ്രശസ്‌തമായ നാടാണ് തമിഴ്‌നാട്. പക്ഷേ ഇവിടുത്തെ മിക്ക ക്ഷേത്രങ്ങളിലും അമ്മദൈവങ്ങളാണ് പ്രതിഷ്‌ഠ. ചിലയിടങ്ങളില്‍ മുരുഗനും മറ്റും ഉണ്ടെന്നതും ശരിയാണ്. ഇപ്പോള്‍ 'അന്യഗ്രഹ ദൈവവും'
വ്യത്യസ്‌തമായി ഒരു ക്ഷേത്രം നിര്‍മ്മിച്ചെങ്കിലും ഇവിടെ നിന്ന് പക്ഷേ നമ്മുടെ പരമ്പരാഗത ദൈവങ്ങളെയൊന്നും നിര്‍മ്മാതാവ് ഒഴിവാക്കിയിട്ടില്ല. ഈ ക്ഷേത്രത്തിന്‍റെ നിര്‍മ്മാണത്തിന് പ്രേരിപ്പിച്ചത് എന്താണെന്ന് അറിയാമോ. നമ്മുടെ നാട്ടില്‍ വര്‍ദ്ധിച്ച് വരുന്ന പ്രകൃതി ദുരന്തങ്ങള്‍. അന്യഗ്രഹ ജീവി ദൈവത്തിന് പ്രകൃതി ദുരന്തങ്ങളെ തടയാനുള്ള ശക്തിയുണ്ടത്രേ.
യാത്രയ്ക്ക് ഒരുങ്ങും മുമ്പ് ആ ക്ഷേത്രത്തെ കുറിച്ച് കുറച്ച് കാര്യങ്ങള്‍ നമുക്ക് അറിയാം. തമിഴ്‌നാട്ടുകാരനായ ലോഗനാതന്‍ ആണ് അന്യഗ്രഹ ജീവിയെ പ്രതിഷ്‌ഠയാക്കി ക്ഷേത്രം നിര്‍മ്മിച്ചിരിക്കുന്നത്. പരമ്പരാഗത ക്ഷേത്ര സങ്കല്‍പ്പങ്ങളില്‍ നിന്ന് ഏറെ വ്യത്യസ്‌തമാണ് ഈ ക്ഷേത്രം. താന്‍ അന്യഗ്രഹ ജീവികളോട് സംസാരിച്ച് അനുമതി വാങ്ങിയ ശേഷമാണ് ഈ ക്ഷേത്രം നിര്‍മ്മിച്ചതെന്നും ലോഗനാതന്‍ പറയുന്നു.
ഒരു ഏക്കര്‍ ഭൂമിയുടെ മൂന്നിലൊന്നും ക്ഷേത്രത്തിനായി മാറ്റി വച്ചിരിക്കുന്നു. അന്യഗ്രഹ ജീവി വിഗ്രഹത്തിന് പുറമെ ശിവന്‍, പാര്‍വതി, മുരുഗന്‍, കാളി തുടങ്ങിയവരുടെ പ്രതിഷ്‌ഠയും ഈ ക്ഷേത്രത്തിലുണ്ട്. ഭൂമിയില്‍ നിന്ന് പതിനൊന്ന് അടി താഴത്തായാണ് ഇവരെ പ്രതിഷ്‌ഠിച്ചിരിക്കുന്നത്.
ലോകമെമ്പാടും പ്രകൃതി ദുരന്തങ്ങള്‍ വര്‍ദ്ധിച്ച് വരുന്ന സാഹചര്യത്തില്‍ അന്യഗ്രഹ ജീവികളെ ആരാധിക്കുന്നത് ഏറെ ഗുണകരമാകുമെന്ന് ലോഗനാതന്‍ പറയുന്നു. ഇവയ്ക്ക് പ്രകൃതി ദുരന്തങ്ങള്‍ തടുക്കാന്‍ സാധിക്കുമത്രേ. അതേസമയം നമ്മള്‍ സിനിമകളില്‍ കാണും പോലെയല്ല അന്യഗ്രഹ ജീവികളെന്നും ഇദ്ദേഹം പറയുന്നു.
ശരീരത്തില്‍ വാഴയില പൊതിഞ്ഞാല്‍ നിങ്ങള്‍ക്ക് അന്യഗ്രഹ ജീവികളുടെ റേഡിയനില്‍ നിന്ന് രക്ഷപ്പെടാനാകുമെന്നും ഇയാള്‍ പറയുന്നു. എന്നാല്‍ ഇതിന് യാതൊരു ശാസ്‌ത്രീയ അടിത്തറയൊന്നുമില്ല. ഏതായാലും ലോഗനാഥനും അദ്ദേഹത്തിന്‍റെ അമ്പലവുമാണ് ഇപ്പോള്‍ നാട്ടിലെ സംസാരവിഷയം. നിരവധി പേരാണ് ഈ ക്ഷേത്രം കാണാന്‍ നിത്യവും ഇങ്ങോട്ട് എത്തുന്നത്.
