കൊല്‍ക്കത്ത: തെരഞ്ഞെടുപ്പ് പെരുമാറ്റച്ചട്ടം നിലനില്‍ക്കെ പ്രതിപക്ഷ നേതാക്കളെ തെരഞ്ഞ് പിടിച്ച് അറസ്‌റ്റ് ചെയ്യുന്നതിനെതിരെ ഇന്ത്യ മുന്നണി തെരഞ്ഞെടുപ്പ് കമ്മീഷനെ കണ്ട് പ്രതിഷേധം അറിയിക്കുമെന്ന് പശ്ചിമബംഗാള്‍ മുഖ്യമന്ത്രിയും തൃണമൂല്‍ കോണ്‍ഗ്രസ് അധ്യക്ഷയുമായ മമത ബാനര്‍ജി. രാജ്യസഭാംഗങ്ങളായ ഡെറിക് ഒബ്രിയാനും, മൊഹ്‌ദ് നദിമുള്‍ ഹക്കും തൃണമൂല്‍ കോണ്‍ഗ്രസിനെ പ്രതിനിധീകരിച്ച് തെരഞ്ഞെടുപ്പ് കമ്മീഷനെ കാണും. ഇന്ന് തന്നെ ഇന്ത്യ സഖ്യ നേതാക്കള്‍ തെരഞ്ഞെടുപ്പ് കമ്മീഷനെ നേരില്‍ കണ്ട് ഇത്തരം നടപടിയില്‍ അതൃപ്‌തി രേഖപ്പെടുത്തുമെന്നും മമത എക്‌സില്‍ കുറിച്ചിട്ടുണ്ട് (Mamata Banerjee on Arrests Of Opposition Leaders).
കഴിഞ്ഞ ദിവസം രാത്രി എന്‍ഫോഴ്‌സ്മെന്‍റ് ഡയറക്‌ടറേറ്റ് അറസ്‌റ്റ് ചെയ്‌ത ഡല്‍ഹി മുഖ്യമന്ത്രി അരവിന്ദ് കെജ്‌രിവാളിന് മമത ഐക്യദാര്‍ഢ്യം പ്രഖ്യാപിച്ചു. കെജ്‌രിവാളിന്‍റെ ഭാര്യ സുനിത കെജ്‌രിവാളിനെ നേരിട്ട് വിളിച്ച് തന്‍റെ പിന്തുണ അറിയിക്കുകയും ചെയ്‌തു. കെജ്‌രിവാളിന്‍റെ അറസ്‌റ്റിനെ താന്‍ ശക്തമായി അപലപിക്കുന്നതായി മമത എക്‌സില്‍ കുറിച്ചു. ജനങ്ങള്‍ തെരഞ്ഞെടുത്ത, നിലവില്‍ അധികാരത്തിലുള്ള മുഖ്യമന്ത്രിയെയാണ് അറസ്‌റ്റ് ചെയ്‌തിരിക്കുന്നതെന്നും മമത ചൂണ്ടിക്കാട്ടി. പ്രതിപക്ഷ കക്ഷികളിലെ മുഖ്യമന്ത്രിമാരെ തെരഞ്ഞുപിടിച്ച് അറസ്‌റ്റ് ചെയ്യുകയാണെന്നും അവര്‍ ആരോപിച്ചു.
അതേസമയം ഇഡിയും സിബിഐയും കുറ്റക്കാരെന്ന് കണ്ടെത്തിയവര്‍ക്ക് ബിജെപിയുമായി കൂട്ട് ചേരുന്നതോടെ അവരുടെ കുറ്റകൃത്യങ്ങള്‍ നിര്‍ബാധം തുടരാന്‍ അധികൃതര്‍ അവസരം ഒരുക്കുന്നുവെന്നും മമത കുറ്റപ്പെടുത്തി. ഇതിലൂടെ ജനാധിപത്യത്തെ നിഷ്‌ഠൂരം കശാപ്പ് ചെയ്യുകയാണെന്നും മമത പോസ്‌റ്റില്‍ ആരോപിച്ചു.
കെജ്‌രിവാളിന്‍റെ അറസ്‌റ്റിന് പിന്നാലെ അദ്ദേഹത്തിന് പിന്തുണയുമായി പ്രതിപക്ഷ സഖ്യ നേതാക്കള്‍ എല്ലാവരും രംഗത്ത് എത്തിയിരുന്നു. നിങ്ങള്‍ക്ക് അരവിന്ദ് കെജ്‌രിവാളിനെ അറസ്‌റ്റ് ചെയ്യാനായേക്കും എന്നാല്‍ അദ്ദേഹത്തിന്‍റെ ആശയങ്ങളെ അറസ്‌റ്റ് ചെയ്യാനാകുമോ എന്ന് പഞ്ചാബ് മുഖ്യമന്ത്രി ഭഗവന്ത് മാന്‍ എക്‌സില്‍ കുറിച്ചു. അരവിന്ദ് കെജ്‌രിവാള്‍ ഒരു വ്യക്തിയല്ല മറിച്ച് ഒരു ആശയമാണ്. തങ്ങളുടെ നേതാവിനൊപ്പം പാറപോലെ ഉറച്ച് നില്‍ക്കുമെന്നും അദ്ദേഹം വ്യക്തമാക്കി. ഇന്‍ക്വിലാബ് സിന്ദാബാദ് എന്ന് പറഞ്ഞ് കൊണ്ടാണ് അദ്ദേഹം പോസ്‌റ്റ് അവസാനിപ്പിച്ചിരിക്കുന്നത്.
മുതിര്‍ന്ന കോണ്‍ഗ്രസ് നേതാവ് ശശി തരൂരും ഡല്‍ഹി മുഖ്യമന്ത്രിയുടെ അറസ്‌റ്റിനെ അപലപിച്ചിട്ടുണ്ട്. എന്താണ് സംഭവിച്ചതെന്ന് മനസിലാക്കി സുപ്രീം കോടതി പ്രഥമദൃഷ്‌ട്യാ കേസ് എടുക്കണമെന്ന് തരൂര്‍ ആവശ്യപ്പെട്ടു. ജനാധിപത്യത്തിന്‍റെ ആത്മാവ് ലംഘിക്കപ്പെട്ടിരിക്കുകയാണെന്നും തരൂർ ചൂണ്ടിക്കാട്ടി.
Also Read: കെജ്‌രിവാളിനെ കോടതിയില്‍ ഹാജരാക്കി ; 10 ദിവസത്തെ കസ്റ്റഡി ആവശ്യപ്പെട്ട് ഇഡി
തെലങ്കാന മുന്‍ മുഖ്യമന്ത്രി കെ ചന്ദ്രശേഖര റാവുവിന്‍റെ മകളും ഭാരത് രാഷ്‌ട്രസമിതി നേതാവുമായ കെ കവിതയെ അറസ്‌റ്റ് ചെയ്‌ത് ദിവസങ്ങള്‍ക്ക് ശേഷമാണ് കെജ്‌രിവാളിനെയും അറസ്‌റ്റ് ചെയ്‌തിരിക്കുന്നത്. ഇപ്പോള്‍ റദ്ദാക്കപ്പെട്ട മദ്യ നയവുമായി ബന്ധപ്പെട്ട കള്ളപ്പണം വെളുപ്പിക്കല്‍ കേസിലാണ് കവിതയുടെ അറസ്‌റ്റ്. അടുത്തമാസം 19 മുതല്‍ ജൂണ്‍ ഒന്ന് വരെ നടക്കുന്ന തെരഞ്ഞെടുപ്പ് പ്രക്രിയയ്ക്ക് തൊട്ടുമുമ്പാണ് കെജ്‌രിവാളിന്‍റെ അറസ്‌റ്റ് എന്നതും ശ്രദ്ധേയമാണ്.
