ചണ്ഡീഗഡ്‌ : കേന്ദ്രവും കർഷകരുമായുളള നാലാം വട്ട ചർച്ചയ്‌ക്ക് ശേഷം ഡല്‍ഹി ചലോ മാര്‍ച്ച് താത്‌കാലികമായി നിര്‍ത്തിവച്ച് കര്‍ഷകര്‍. പ്രശ്‌നങ്ങള്‍ക്ക് പരിഹാരമായില്ലെങ്കില്‍ ഫെബ്രുവരി 21 മുതല്‍ ഡൽഹി ചലോ മാർച്ചുമായി കർഷകർ മുന്നോട്ട് പോകുമെന്ന് പഞ്ചാബ് കിസാൻ മസ്‌ദൂർ സംഘർഷ് കമ്മിറ്റി ജനറൽ സെക്രട്ടറി സർവൻ സിങ് പന്ദർ പറഞ്ഞു. മിനിമം താങ്ങുവില സംബന്ധിച്ച് സർക്കാർ മുന്നോട്ടുവച്ച നിർദേശത്തെക്കുറിച്ച് ചർച്ച രണ്ട് ദിവസത്തിനു ശേഷം നടത്തുമെന്നും അദ്ദേഹം കൂട്ടിച്ചേർത്തു (Farmer Leader After Meeting With Union Ministers).
സർക്കാരിൻ്റെ നിർദേശം സംബന്ധിച്ച് അടുത്ത രണ്ട് ദിവസത്തിനുള്ളിൽ തങ്ങൾ ചർച്ച നടത്തും. മറ്റ് ആവശ്യങ്ങളും സർക്കാർ പരിഗണിക്കും. ചർച്ചയിൽ ഫലമുണ്ടായില്ലെങ്കിൽ ഫെബ്രുവരി 21ന് ഡൽഹി ചലോ മാർച്ചുമായി മുന്നോട്ട് പോകുമെന്ന് അദ്ദേഹം പറഞ്ഞു. തിങ്കളാഴ്‌ച ചണ്ഡീഗഡിൽ പ്രതിഷേധിച്ച കർഷക യൂണിയനുകളും കേന്ദ്രമന്ത്രിമാരും തമ്മിലുള്ള കൂടിക്കാഴ്‌ചയുടെ സമാപനത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
സർക്കാരുമായുള്ള നാലാം റൗണ്ട് ചർച്ചയിൽ കർഷകരുടെ ആവശ്യങ്ങളെക്കുറിച്ച് വിശദമായ ചർച്ച നടത്തിയെന്ന് എസ്‌കെഎം നേതാവ് ജഗ്‌ജിത് സിങ് വ്യക്തമാക്കി. പയറുവർഗങ്ങൾ, ചോളം, പരുത്തി എന്നിവയ്ക്ക് എംഎസ്‌പി ഉറപ്പുനൽകുന്ന ഒരു നിർദേശം സർക്കാർ തങ്ങൾക്ക് നൽകിയിട്ടുണ്ടെന്നും ഇതിൽ രണ്ട് സർക്കാർ ഏജൻസികൾ മേൽനോട്ടം വഹിക്കുകയും നിയന്ത്രിക്കുകയും ചെയ്യുമെന്നും കർഷക സംഘടനകളും കേന്ദ്രമന്ത്രിമാരും ചണ്ഡീഗഡിൽ നടത്തിയ യോഗത്തിൻ്റെ സമാപനത്തിന് ശേഷം അദ്ദേഹം പറഞ്ഞു.
'എംഎസ്‌പിയുടെ മേലുളള സർക്കാരിന്‍റെ നിർദേശം ഞങ്ങൾ വിദഗ്‌ധരുമായി ചർച്ച ചെയ്യും. ശേഷം ഞങ്ങൾ ഒരു നിഗമനത്തിലെത്തും. ആവശ്യങ്ങൾ നിറവേറ്റുന്നത് വരെ ഞങ്ങൾ ഡൽഹി ചലോ മാർച്ചുമായി മുന്നോട്ട് പോകും'. മറ്റു പല ആവശ്യങ്ങളിലും ചർച്ചകൾ നടത്തേണ്ടതുണ്ടെന്ന് ദല്ലേവാൾ എഎൻഐയോട് പറഞ്ഞു.
കർഷക പ്രതിനിധികളുമായി തങ്ങൾ വളരെ ക്രിയാത്മകവും വിപുലവുമായ ചർച്ച നടത്തിയെന്ന് നേരത്തെ കേന്ദ്രമന്ത്രി പിയൂഷ് ഗോയൽ പറഞ്ഞിരുന്നു. സർക്കാർ നിർദേശങ്ങളിൽ കർഷക നേതാക്കൾ നാളെ തീരുമാനം പ്രഖ്യാപിക്കുമെന്നും അദ്ദേഹം കൂട്ടിച്ചേർത്തു.
അതേസമയം സർക്കാരും കർഷക സംഘടനകളും ഈ പ്രശ്‌നങ്ങൾക്ക് പരിഹാരം കാണാൻ ശ്രമിക്കുമെന്നും അദ്ദേഹം വ്യക്തമാക്കി. സർക്കാരിൻ്റെ നിർദേശത്തിൽ തങ്ങൾ ചർച്ച നടത്തി ഒരു തീരുമാനത്തിൽ എത്തും. ഇന്ന് രാവിലെയോ വൈകുന്നേരമോ അല്ലെങ്കിൽ മറ്റന്നാളോ തീരുമാനമെടുക്കുമെന്ന് അദ്ദേഹം കൂട്ടിച്ചേർത്തു.
ഡൽഹിയിൽ തിരിച്ചെത്തിയ ശേഷം മറ്റ് ആവശ്യങ്ങളിൽ ചർച്ച നടത്തുമെന്ന് മന്ത്രിമാർ അറിയിച്ചു. ഫെബ്രുവരി 19-20 തീയതികളിൽ ചർച്ചകൾ നടക്കും. ഫെബ്രുവരി 21 ന് നിശ്ചയിച്ചിരിക്കുന്ന 'ഡൽഹി ചലോ' മാർച്ചിന്‍റെ അടിസ്ഥാനത്തിൽ തീരുമാനിക്കും. സർക്കാരും കർഷക യൂണിയനും ചേർന്ന് ഒരുമിച്ച് പ്രശ്‌നങ്ങൾക്ക് പരിഹാരം കണ്ടെത്തുമെന്ന് ദല്ലേവാൾ വ്യക്തമാക്കി.
