ന്യൂഡൽഹി: മഹാരാഷ്ട്ര നിയമസഭ തെരഞ്ഞെടുപ്പിനുള്ള സ്ഥാനാർഥി പട്ടിക ഒരാഴ്ചയ്ക്കുള്ളിൽ പുറത്തുവിടുമെന്ന് ബിജെപി. ഭരണപക്ഷമായ മഹായുതി സഖ്യം ഏതാണ്ട് 90 ശതമാനം സീറ്റുകളിലും സമവായത്തിലെത്തിയതായും വൃത്തങ്ങള്‍ അറിയിച്ചു. ബിജെപി 150 ലധികം സീറ്റുകളിലും ഏക്‌നാഥ് ഷിൻഡെ പക്ഷം ശിവസേന 80-85 സീറ്റുകളിലും അജിത് പവാറിന്‍റെ എൻസിപി 40-45 വരെ സീറ്റുകളിലും മത്സരിക്കുമെന്നാണ് സൂചന.
മുസ്‌ലിം ഭൂരിപക്ഷ സീറ്റുകളിൽ എൻസിപി സ്ഥാനാർഥികളെ മത്സരിപ്പിച്ചേക്കും. ബിജെപി കേന്ദ്ര തെരഞ്ഞെടുപ്പ് കമ്മിറ്റി യോഗം ഡല്‍ഹിയില്‍ ചേരുകയും സ്ഥാനാർഥികളെ കുറിച്ച് ചർച്ച നടത്തുകയും ചെയ്‌തിരുന്നു. 100 ലധികം സീറ്റുകളിലാണ് ചർച്ച നടന്നത്. മഹായുതി സഖ്യത്തിലെ മറ്റ് കക്ഷികളുമായുള്ള സീറ്റ് വിഭജന ചർച്ചയ്‌ക്ക് ശേഷം ബാക്കി സ്ഥാനാർഥികളെ തീരുമാനിക്കുമെന്നും വൃത്തങ്ങള്‍ അറിയിച്ചു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
ബിജെപി ദേശീയ അധ്യക്ഷൻ ജെപി നദ്ദയുടെ അധ്യക്ഷതയിൽ പ്രധാനമന്ത്രി നരേന്ദ്ര മോദിയുടെ നേതൃത്വത്തിലാണ് ബുധനാഴ്‌ച രാത്രി യോഗം നടന്നത്. ആഭ്യന്തര മന്ത്രി അമിത് ഷാ, അശ്വിനി വൈഷ്‌ണവ്, ഭൂപേന്ദ്ര യാദവ്, പിയൂഷ് ഗോയൽ, ഓർഗനൈസേഷൻ ജനറൽ സെക്രട്ടറി ബി എൽ സന്തോഷ് എന്നിവരുൾപ്പെടെ മുതിർന്ന പാർട്ടി നേതാക്കളും മഹാരാഷ്ട്ര ബിജെപി നേതാക്കളായ ദേവേന്ദ്ര ഫഡ്‌നാവിസ്, റാവുസാഹേബ് ദൻവെ, വിനോദ് താവ്‌ഡെ, ആശിഷ് ഷെലാർ, എന്നിവരും യോഗത്തില്‍ പങ്കെടുത്തു.
288 അംഗ മഹാരാഷ്ട്ര നിയമസഭയിലേക്ക് നവംബര്‍ 20 നാണ് തെരഞ്ഞെടുപ്പ് നടക്കുക. നവംബർ 23 ന് വോട്ടെണ്ണും. ബിജെപി, ശിവസേന (ഷിൻഡെ വിഭാഗം), എൻസിപി (അജിത് പവാര്‍) എന്നിവരുടെ മഹായുതി സഖ്യവും ശിവസേന (യുബിടി), എൻസിപി (ശരദ് പവാർ വിഭാഗം), കോൺഗ്രസ് എന്നിവരുടെ മഹാ വികാസ് അഘാഡി സഖ്യവുമാണ് മഹാരാഷ്‌ട്രയില്‍ പ്രധാന എതിരാളികള്‍.
അതേസമയം കോൺഗ്രസിന്‍റെ മഹാരാഷ്ട്ര തെരഞ്ഞെടുപ്പ് സ്ക്രീനിങ് കമ്മിറ്റിയും ഡൽഹിയിലെ ഹിമാചൽ ഭവനിൽ യോഗം ചേർന്നിരുന്നു. പാർട്ടിയുടെ സംസ്ഥാന ചുമതലയുള്ള രമേശ് ചെന്നിത്തല, മഹാരാഷ്ട്ര പ്രദേശ് കോൺഗ്രസ് കമ്മിറ്റി പ്രസിഡന്‍റ് നാനാ പടോലെ, ബാലാസാഹേബ് തൊറാട്ട്, പ്രതിപക്ഷ നേതാവ് വിജയ് വാദേത്തിവാർ, സതേജ് പാട്ടീൽ എന്നിവർ യോഗത്തിൽ പങ്കെടുത്തു.
2021 ല്‍ പ്രകാശ് അംബേദ്‌കര്‍ രൂപീകരിച്ച വഞ്ചിത് ബഹുജൻ ആഘാഡി മഹാരാഷ്ട്ര നിയമസഭ തെരഞ്ഞെടുപ്പിനുള്ള മൂന്നാം സ്ഥാനാർഥി പട്ടികയും പ്രഖ്യാപിച്ചു. 30 സ്ഥാനാർഥികളുടെ പേരാണ് മൂന്നാം പട്ടികയില്‍ പ്രഖ്യാപിച്ചത്.
