हैदराबाद : सामान्यत: सार्वजनिक ठिकाणी एखाद्या व्यक्तीच्या त्वचेवर किंवा शरीराच्या कोणत्याही भागावर पांढरे डाग पडलेले दिसतात, तेव्हा ते त्या व्यक्तीपासून दूर राहू लागतात. जगातील बहुतेक देशांमध्ये, शारीरिक परिस्थितीने ग्रस्त असलेल्या लोकांना दररोज भेदभावाचा सामना करावा लागतो. ज्या स्थितीत लोकांच्या शरीरावर पांढरे डाग पडतात त्याला त्वचारोग म्हणतात. लोकांमध्ये या स्थितीबद्दल आणि त्याच्या विविध प्रकारांबद्दल जागरूकतेचा अभाव आहे.
आजाराबद्दल जनजागृती : अलीकडे, मल्याळी अभिनेत्री ममता मोहनदासची एक सोशल मीडिया पोस्ट खूप लोकप्रिय झाली. त्यामध्ये तिने उघड केले की, तिला त्वचारोगाचे निदान झाले आहे, ज्यामुळे तिच्या त्वचेचा रंग बदलत आहे. ममता व्यतिरिक्त, जगभरातील इतर अनेक प्रसिद्ध व्यक्ती आहेत, जे या आजाराचे बळी पडले आहेत. त्यांनी या आजाराबद्दल जनजागृती करण्याचा प्रयत्न केला आहे. मायकल जॅक्सन, अमिताभ बच्चन, सुपरमॉडेल विनी हार्लो, अभिनेत्री नफिसा अली आणि सुप्रसिद्ध टीव्ही प्रस्तुतकर्ता ग्रॅहम नॉर्टन हे या आजाराने ग्रस्त असलेल्या काही सेलिब्रिटींमध्ये आहेत.
कोणत्याही भागावर होतो परिणाम : दिल्लीतील त्वचारोगतज्ञ डॉ. सूरज भारती म्हणाले, त्वचारोग हा एक प्रकारचा त्वचा विकार आहे. त्यामध्ये शरीराच्या एक किंवा अधिक भागांमध्ये त्वचेवर लहान किंवा मोठे पांढरे ठिपके दिसतात. ही स्थिती शरीराच्या कोणत्याही भागावर परिणाम करू शकते. सुरुवातीला हे पांढरे ठिपके रुग्णाच्या त्वचेवर लहान पांढरे डागांच्या रूपात तयार होतात, जे पसरू लागतात. ही दुर्मिळ स्थिती असली तरी काही विशिष्ट प्रकारच्या त्वचारोगामध्ये शरीराच्या बहुतांश भागांच्या त्वचेचा रंगही बदलू शकतो किंवा पांढरा होऊ शकतो. या समस्येमुळे, काहीवेळा त्वचेच्या रंगासोबत, प्रभावित भागातील केसांचा रंग आणि तोंडाच्या आतील त्वचेचा रंग देखील बदलू शकतो.
त्वचारोगाची शक्यता : त्वचारोगाला 'पांढरे कुष्ठ' असेही म्हणतात. अनेक लोक याला कुष्ठरोग समजण्याची चूक करतात. आजही लोकांचा एक मोठा वर्ग हा संसर्गजन्य आजार मानतात. लोक या समस्येने त्रस्त असलेल्या लोकांशी किंवा त्यांच्या वस्तूंशी संपर्क टाळतात आणि त्यांच्या जवळ बसणेही टाळतात. पण, त्वचारोग हा संसर्गजन्य नाही. डॉ भारती सांगतात की, सामान्यतः कोणत्याही प्रकारचे पांढरे डाग वैद्यकीय भाषेत त्वचारोग म्हणतात. जेव्हा कोणत्याही रोगामुळे किंवा इतर कारणांमुळे, त्वचेला रंग देणाऱ्या मेलेनिन तयार करणाऱ्या पेशी नष्ट होऊ लागतात किंवा इतर कोणत्याही कारणामुळे मेलेनिनचे उत्पादन थांबते, तेव्हा त्वचारोग होण्याची शक्यता वाढते.
हेही वाचा : आत्ताच काळजी घ्या, हिवाळ्यात वाढू शकते डिहायड्रेशनची समस्या
