हैदराबाद : ख्रिश्चन धर्मात येशूला देवाचा पूत्र मानण्यात येते. त्यामुळे ख्रिश्चन धर्मीय बांधव चर्चमध्ये जाऊन येशू यांची पूजा करतात. गुड फ्रायडे या दिवशी येशूला क्रॉसवर लटकविण्यात आले. त्यामुळे या दिवसाला काळा दिवस असेही संबोधले जाते. ख्रिश्चिन बांधव या दिवशी कोणताही सण साजरा करत नाहीत. तर चर्चमध्ये जाऊन येशूची माफी मागत आपले पापक्षालन करतात. या दिवसाला ब्लॅक फ्रायडे असेही संबोधण्यात येते. त्यामुळे जाणून घेऊया नेमके काय आहे या दिवसाचे महत्व.
काय आहे येशू यांना क्रॉसवर खिळवल्याचा इतिहास : मानवाच्या कल्याणासाठी देवाने आपला पूत्र येशूला पृथ्वीवर पाठवल्याची अख्यायिका बायबल या ख्रिश्चन धर्मग्रंथानुसार वर्तवण्यात येते. त्यामुळे येशू व्हॅटीकन सिटी आणि रोममधील नागरिकांना देवाविषयी माहिती देत असत. मात्र त्यांचा शिष्य यहुदाने 30 चांदीच्या नाण्यासाठी फितुरी करत येशूची माहिती रक्षकांना दिली. त्यामुळे येशूचा शिष्य जुडास इस्किरिओट याच्या नेतृत्वाखाली गेथसेमानेच्या बागेत रक्षकांनी येशूला अटक केल्याची अख्यायिका वर्णन करण्यात येते. देवाचा पूत्र असल्याचा दावा केल्याने येशूला देशद्रोही ठरवून त्यांच्यावर आरोप करण्यात आले. यावेळी रोमन गव्हर्नर पॉन्टियस पायलट यांनी येशू यांच्यावर करण्यात आलेले आरोप निराधार असल्याचे कथन केले. मात्र येशू देवाचा पूत्र असल्याचा दावा करत असल्याचे सांगितल्याने जमाव संतप्त झाला. त्यामुळे दंगल टाळण्यासाठी त्याने येशू यांना जमावाच्या ताब्यात दिले. त्यानंतर जमावाने तब्बल 6 तास येशू यांना क्रॉसवर खिळ्याने ठोकून प्रचंड हाल केल्याचे वर्णन ख्रिश्चन धर्मग्रंथात करण्यात येते.
मृत्यूनंतर पुन्हा जिवंत : देवाचा पूत्र असल्याचा दावा करणाऱ्या येशू यांना क्रॉसवर खिळ्याने लटकविल्याने त्यांचा मृत्यू झाला. हा दिवस शुक्रवार होता. त्यामुळे या दिवसाला ख्रिश्चन बांधव ब्लॅक फ्रायडे असेही संबोधत असल्याचे दिसून येते. येशू यांचा मृत्यू झाल्यानंतर त्यांचा शिष्य जोसेफ यांनी त्यांना दफन केले. त्यानंतर तीन दिवसांनी येशू जिवंत झाल्याची आख्यायिका ख्रिश्चन धर्म ग्रंथात वर्णन करण्यात येते. त्यामुळे गुड फ्रायडेनंतर येणाऱ्या रविवारी ईस्टर संडे साजरा करण्यात येतो. ईस्टर संडेला येशू यांनी पुन्हा जन्म घेतल्याची अख्यायिका आहे.
कशी करतात गुड फ्रायडेची पूजा : ख्रिश्चन बांधव गुड फ्रायडे हा काळा दिवस असल्याचे मानतात. त्यामुळे या दिवशी चर्चमध्ये कोणतीही पूजा किवा प्रार्थना होत नाही. यादिवशी फक्त एका हातोड्याने वाजवून आवाज केला जातो. त्यानंतर येशू यांची माफी मागितली जाते. चर्चमध्ये नेहमीप्रमाणे घंटा वाजवण्यात येत नाही. या दिवशी ख्रिश्चन बांधव काळे कपडे परिधान करतात.
हेही वाचा - Chhatrapati Shivaji Maharaj Death Anniversary: आज छत्रपती शिवाजी महाराजांची ३४३ वी पुण्यतिथी, जाणून घेवू या इतिहास
