वाशिम - परतीच्या पावसामुळे वाशिम जिल्ह्यात देखील शेतकऱ्यांचे मोठे नुकसान झाले आहे. तर अनेकांचा संसार देखील आता उघड्यावर पडला असून शेती पीक वाहून गेल्याने खाणार काय? असा मोठा प्रश्न उभा राहिला आहे. यानंतर अनेक राजकीय पक्षांनी शेतकऱ्यांना लवकरात लवकर नुकसान भरपाई मिळावी यासाठी आंदोलनही केले. त्यानंतर सरकारने शुक्रवारी अतिवृष्टीसाठी १० हजार कोटीचे पॅकेज जाहीर केले. त्यावर स्वाभिमानी शेतकरी संघटनेचे नेते रविकांत तुपकर यांनी नाराजी व्यक्त करत सरकारवर टीका केली आहे. ते वाशिम जिल्ह्यात दुष्काळी दौऱ्यावर होते.
भिकेचा तुकडा टाकल्या सारखी ही 10 हजाराची मदत ईटीव्ही भारतशी बोलताना तुपकर यांनी, मुख्यमंत्र्यांनी जाहीर केलेली ही 10 हजार(हेक्टरी शेतपिकांना)मदत अत्यंत तोकडी आणि भिकेचा तुकडा टाकल्या सारखी असल्याची म्हणत सरकारच्या मदतीवर टीका केली. ‘ही मदत म्हणजे शेतकऱ्यांच्या तोंडाला पाने पुसण्याचे काम आहे.आम्हाला ही मदत मान्य नाही, शेतकऱ्यांच्या हातातून सर्व पिकं वाया गेलेली आहेत. अशा पार्श्वभूमीवर ही मदत अत्यंत तोकडी आहे. उद्धव ठाकरे मुख्यमंत्री नसताना ते हेक्टरी २५ हजार रुपयांची मागणी करत होते. मग आता ही मदत करून त्यांनी काय साध्य केलं आहे? असा सवाल तुपकर यांनी विचारला.तर, आम्ही शेतकरी म्हणजे भिकारी नाहीत, भिकेचा कटोरा घेऊन यांच्या दारात उभे नाहीत. आम्ही आमचा हक्क मागत आहोत. ही मदत आम्हाला मान्य नाही, भिकेचा तुकडा टाकल्या सारखी ही 10 हजार रुपयांची मदत आहे. संकटाच्या काळात सरकारने मदत करणे हे त्याचं कामच आहे. व शेतकऱ्यांना कमीतकमी हेक्टरी 25 हजार रुपयांच्या मदतीची मागणी तुपकर यांनी यावेळी केली आहे.
