वर्धा - शहरातील कारागृहात भीषण पाणीटंचाई निर्माण झालेली आहे. पाण्याची गरज भागवायला येथे एक नव्हे तर ६ विहिरी आहेत. मात्र, गेल्या ५ दशकांमध्ये यंदा सहाही विहिरींनी तळ गाठला आहे.
कैद्यांना रोज पिण्यासाठी, स्वछतेसाठी पाणी लागत असते. सोबतच अन्न शिजवायला सुद्धा पाणी पाहिजे. सुरुवातीला नगरपरिषदेतून पाणी पुरवठा होत होता. मात्र, दररोजच्या पाण्याची गरज लक्षात घेऊन १६ हजार लिटर ते १७ हजार लिटर नळाने भागवली जाऊ शकत नाही. मात्र, शहरात ४ ते ५ दिवसांनी पाणी पुरवठा होत होता. त्यामुळे कारागृहाला पाणीपुरवठा करण्यासाठी पोलीस अधीक्षकांना विनंती करण्यात आली. त्यानंतर कारागृहासाठी पोलीस मुख्यालयातील विहिरीतून टँकरने पाणीपुरवठा करण्यात आला. आता नगर परिषदेकडून दिवसभरात ११ हजार लिटरच्या घरात पाणी पुरवले जात असल्याचे कारागृह अधीक्षक अनिल खामकर यांनी ईटीव्ही भारतशी बोलताना सांगितले.
पाणी टंचाईने कारागृहात रोगराई पसरण्याची भीती -
पाणी नसल्यास कारागृहात अस्वच्छता होईल. कैद्यांना स्वच्छतेसाठी पाणी पाहीजे असते. मात्र, कारागृहात दुष्काळ पडल्यामुळे आरोग्याचे प्रश्न उद्भवण्याची भिती निर्माण झाली आहे. त्यामुळे काराृह अधीक्षक आणि कर्मचाऱ्यांनी कैद्यांना पाणी काटकसरीने पाणी वापरण्याच्या सुचना दिल्या आहेत.
शेतीपिकाचे नुकसान -
वर्धा कारागृह शेतीत उत्पन्न घेण्यात नेहमीच अव्वल राहिले आहे. मात्र, दुष्काळामुळे यंदा हे कारागृह तोट्यात गेले आहे. पाण्याअभावी जवळपास ७ एकरावरील पीक करपले आहे. कोबीचा भुसा झाला आहे. चवळीचे पीकही करपले आहे. त्यामुळे कैद्यांना खायला काय द्यावे? असा प्रश्न कारागृहासमोर उभा झाला आहे. तसेच दुष्काळामुळे शेतात काम नसल्याने कैद्यांच्या कामावरही गदा आली आहे.
