वर्धा - उभ्या असलेल्या एसटी बसला कारने मागून जोरदार धडक दिल्याची घटना नागपूर-चंद्रपूर महामार्गावर नारायणपूर शिवारात घडली. या अपघातात कारचालक गंभीर जखमी झाला आहे. शेख इब्राहिम असे जखमी चालकाचे नाव आहे. धडक दिलेल्या कारमधून अवैध दारूची वाहतूक करण्यात येत होती. अपघातानंतर जखमींना मदत करायला ३ जण आले तर दारू पळवून नेण्यासाठी १०० जणांनी गर्दी केल्याचे चित्र पहायला मिळाले.
नागपूर येथून चंद्रपूरकडे जाणाऱ्या बस क्रमांक (एमएच ४० ऐक्यु ६३९४) बसचा टायर पंक्चर झाला होता. नारायणपूर शिवारात टायर बदलण्यास बस उभी केली होती. दरम्यान नागपूर येथून चंद्रपूरला अवैधरित्या दारूची वाहतूक करणाऱ्या कारने (एमएच ३१ ईयु ४६७२) चालकाचे नियंत्रण सुटल्याने बसला मागून जोरदार धडक दिली. यामध्ये कारचालक इब्राहिम शेख जखमी झाला आहे. जखमी चालकाला उपचारासाठी सेवाग्रामला रुग्णालयात नेण्यात आले असून त्याच्यावर उपचार सुरू आहेत.
अपघातानंतर तीन ते चार लोकांनी पुढाकार घेत जखमींना बाहेर काढण्याचा प्रयत्न केला. तर शेकडो लोकांनी गाडीतील दारूच्या बाटल्या पळवण्याचा सपाटा लावला. या घटनेत बसमधील प्रवाशांना कोणतीही दुखापत झाली नाही.
वाचवायला धावले तीन तर दारू पळवायला शंभर
समुद्रपूर पोलीस स्टेशनचे गुन्हे प्रगटीकरण शाखेचे अरविंद येनूरकर हे पथकास घेऊन घटनास्थळी पोहचले होते. जखमीला बाहेर काढण्याचा काम सुरु होते. केवळ तिघा-चौघांनी मिळून जखमी चालकाला बाहेर काढले. मात्र, शंभरच्या घरात दारू नेण्यासाठी वाहने थांबवून आले. दरम्यान कारमध्ये तीन रिकामे खड्याचे बॉक्स मिळून आले. तर काही छोट्या दारूच्या प्लास्टिक बॉटल मिळाल्या असल्याची माहिती अरविंद येनुरकर यांनी दिली.
