ठाणे - एकीकडे गटारावर झाकण नसल्यामुळे दुचाकीसह चालक खोल गटारात पडला तर दुसरीकडे महापालिकेने खोदलेल्या खड्ड्यात अजून एक दुचाकीस्वार पडला आहे. हा सर्व प्रकार आहे शनिवारी उल्हासनगर शहरात घडला. मात्र या घटनेमुळे पालिकेचा कारभार पुन्हा एकदा चव्हाट्यावर आला आहे.
उल्हासनगर शहरात रात्रभर जोरदार पाऊस पडत होता, त्यामुळे शहरातील गटारे, नाले दुथडी भरून वाहत होते. गटारे भरून पाणी वाहत असल्याने त्यावर झाकण आहे की नाही याचा अंदाज न आल्याने दुचाकीस्वार थेट गटारात पडल्याची घटना अमन टॉकीज रोडवर घडली. तर दुसरा प्रकार फर्निचर मार्केटमध्ये घडला. त्यानंतर आसपासच्या लोकांनी दोघांनाही बाहेर काढले असून दोघेही सुखरूप आहेत.
फर्निचर मार्केट लिंक रोड परिसरात पाण्याचा निचरा होण्यासाठी महापालिकेने एक खड्डा खणला होता मात्र पावसामुळे त्या खड्ड्यात पाणी भरल्याने तो खड्डा चालकांना दिसत नव्हता. एक दुचाकीसह दोन तरूण खड्ड्याच्या शेजारून जात असताना अचानक दुचाकीसह खड्ड्यात पडले. वेळीच आजूबाजूच्या लोकांनी खड्ड्यात पडलेल्या तरुणांना बाहेर काढले असून त्यांना कोणतीही इजा झालेली नाही.
दरम्यान नागरीक खुप संतापले असून गटारांवरील झाकणे बसवण्याची आणि खड्डे बुजवण्याची मागणी करत आहेत.
