ठाणे: शहरात दिवसेंदिवस गुन्हेगारीचे प्रमाण वाढत चालले आहे. जीवघेणा हल्ला केल्याची घटना उल्हासनगरमध्ये घडली आहे. याप्रकरणी मध्यवर्ती पोलीस ठाण्यात तीन हल्लेखोर नातेवाईकांवर हत्येचा व जीवेठार मारण्याचा प्रयत्न केल्याप्रकरणी गुन्हा दाखल केला आहे. तर तिन्ही हल्लेखोर फरार झाले आहे. मनवीर मरोठीया असे हत्या झालेल्या नातेवाईकाचे नाव आहे. तर रामपाल करोतीया आणि राखी करोतिया असे हल्ल्यात गंभीर जखमी झालेल्या पती पत्नीचे नाव आहे.
तलवारीने केला हल्ला: मृत मनवीर मरोठीया उल्हासनगर शहरातील फार्व्हर लाईन भागात इमली पाडा परिसरात कुटुंबासह राहत होते. त्यातच गेल्या अनेक दिवसापासून मत मनवीर आणि त्यांच्या मरोठीया कुटुंबात संपत्तीवरून वाद सुरू होता. याच वादातून अनेकदा जोरदार भांडणही झाले. परंतु आज सकाळच्या सुमारास कामावर जात असताना, तीन हल्लेखोर नातेवाईकांनी फार्व्हर लाईन चौकात मनवीर यांना गाठून त्यांच्यावर तलवार आणि लाकडी दांडक्याने हल्ला केला. तर मनवीर सोबतच कामावर जाणारे रामपाल करोतीया, राखी करोतिया यांच्यावरही हल्लेखारांनी जीवघेणा हल्ला केला. या हल्ल्यात मनवीर यांच्यावर तलवारीने गंभीर वार झाल्याने त्यांचा जागीच मृत्यू झाला. तर संपत्तीच्या वादात मध्यस्थी करणारे रामपाल आणि राखी करोतीया यांच्यावर हल्ला झाल्याने ते जखमी झाले आहेत.
जखमी पती व पत्नीवर उपचार सुरू: तीन हल्लेखोरांनी आज सकाळी ६ वाजण्याच्या सुमारास लाकडी दांडके आणि तलवारीच्या साहाय्याने हा हल्ला केली. भर चौकात झालेल्या हत्याच्या थराराने शहरात एकच खळबळ उडाली आहे. जखमी पती व पत्नीवर उल्हासनगरच्या शासकीय मध्यवर्ती रुग्णालयात उपचार सुरू आहेत. या घटनेची माहिती मध्यवर्ती पोलीस ठाण्याचे वरिष्ठ पोलीस निरीक्षक मधुकर यांना मिळताच त्यांनी घटनास्थळी तात्काळ धाव घेतली. पंचनामा करून मृतदेह शवविच्छेदनासाठी रुग्णालयात पाठवला आहे. दरम्यान तीन हल्लेखोर हे फरार झाले असून त्यांच्या शोधासाठी उल्हासनगर क्राईम ब्रांच आणि मध्यवर्ती पोलीस रवाना झाले आहेत. लवकरच आरोपीना अटक केली जाणार असल्याचे वरिष्ठ पोलीस निरीक्षक मधुकर कड यांनी सांगितले.
