ठाण्यात प्रथमच प्रसाधनगृहात महिलांसाठी सुसज्ज मासिक पाळीची खोली

ठाण्यातील म्युज फाउंडेशन आणि महापालिका यांनी एकत्र येऊन शहरातील लोकमान्य नगर परिसरातील सार्वजनिक प्रसाधनगृहात मासिक पाळीची खोली सुरू केली आहे. सॅनिटरी पॅडचा निचरा होण्यासाठी कचरापेटी, आरसा, पाण्याची सुविधा, बाथरूम अशा सुसज्ज खोलीची रचना महिलांच्या गरजा ओळखून करण्यात आली आहे.

ठाणे - दाट लोकवस्तीत राहणाऱ्या महिलांना मासिक पाळीच्या दिवसांत सार्वजनिक प्रसाधनगृहांचा वापर करणे अत्यंत अवघड होत असते. याचा विचार करून ठाण्यातील म्युज फाउंडेशन आणि महापालिका यांनी एकत्र येऊन शहरातील लोकमान्य नगर परिसरातील सार्वजनिक प्रसाधनगृहात मासिक पाळीची खोली सुरू केली आहे. सॅनिटरी पॅडचा निचरा होण्यासाठी कचरापेटी, आरसा, पाण्याची सुविधा, बाथरूम अशा सुसज्ज खोलीची रचना लोकवस्तीतील महिलांच्या गरजा ओळखून करण्यात आली आहे.

1 हजार महिलांचे सर्वेक्षण
ठाणे शहरात नागरिकांसाठी महापालिकेची सार्वजनिक प्रसाधनगृहे उपलब्ध आहेत. या सार्वजनिक प्रसाधनगृहांची अस्वच्छता, दुर्गंधी आणि अपुऱ्या सुविधांमुळे महिलांना त्याचा वापर करणे अवघड असते. विशेषत: मासिक पाळीच्या दिवसांत महिलांना याचा त्रास सहन करावा लागतो. या गोष्टीचा विचार करून म्युज फाउंडेशनने ठाण्यातील शाश्वत मासिक पाळीच्या उपक्रमांतर्गत 2019 मध्ये आझादनगर, गणेशनगर, मानपाडा, रामचंद्रनगर, शास्त्रीनगर, मनीषानगर, रामबाग, शिवाजीनगर, गांधीनगर या शहरातील 15 लोकवस्तींमधील एकूण 1 हजार महिलांचे सर्वेक्षण करण्यात आले होते.

67 टक्के महिलांना सुविधांचा अभाव

सर्वेक्षणातून असे समोर आले की, 67 टक्के नागरिकांच्या घरात प्रसाधनगृहांची सुविधा नाही. त्यामुळे या लोकवस्तीतील महिलांना मासिक पाळीच्या दिवसांतही सार्वजनिक प्रसाधनगृहांवर अवलंबून राहावे लागते. तिथे अस्वच्छता, दुर्गंधी, पाण्याचा तसेच कचरा व्यवस्थापनेचा अभाव अशा समस्यांना येथील महिलांना सामोरे जावे लागत आहे. या सर्व गोष्टींचा विचार करून म्युज फाऊंडेशनने या संदर्भात महापालिकेसोबत चर्चा केली. या चर्चेमध्ये ‘मासिक पाळीची खोली’ ही संकल्पना पुढे आली. सामान्य महिलेचा विचार करून आणि सर्व सुखसुविधांनी उपयुक्त अशी ही खोली एका खासगी कंपनीने बनवली आहे. सध्या ही खोली प्रायोगिक तत्त्वावर एका परिसरात सुरू करण्यात आली आहे.

अशी असेल या खोलीची रचना..
लोकवस्तीत असलेल्या सार्वजनिक प्रसाधनगृहामधील एका स्वच्छतागृहाचे रूपांतर ‘मासिक पाळीची खोली’ यामध्ये करण्यात आले आहे. या खोलीमध्ये नळ, जेट स्प्रे, आरसा, सॅनिटरी पॅडचा निचरा होण्यासाठी कचरापेटी, साबणाची बाटली, कपडे अडकविण्यासाठी खिळे आणि बाथरूम अशा सुविधा उपलब्ध करण्यात आल्या आहेत. लोकवस्तीतील घरांची रचनाही लहान असते, त्यामुळे अनेकदा महिलांना कपडे बदलण्यासही अडचण येत असते. अशा वेळी महिलांना या खोलीचा वापर करता येणार आहे. या खोलीचा वापर कसा करावा यासाठी म्युज फाऊंडेशनतर्फे महिलांना प्रशिक्षण दिले जात आहे.

हेही वाचा - राज्यात ५११ केंद्र लसीकरणासाठी सज्ज - आरोग्यमंत्री