ठाणे - मुल नको म्हणून एका निर्दयी पतीने गरोदर पत्नीला धावत्या लोकलमधून फेकल्याची धक्कादायक घटना समोर आली आहे. ही घटना पश्चिम रेल्वे मार्गावरील दहिसर ते मीरा रोड स्थानकादरम्यान घडली. सुदैवाने महिला बचावल्याने हा खळबळजनक प्रकार उघडकीस आला आहे.
हेही वाचा - इतवारी- नागभिड नॅरोगेज होणार ब्रॉडगेज; नॅरोगेज ट्रेनची धडधड थांबणार
सागर धोडी, असे आरोपी पतीचे नाव असून त्याच्यावर नालासोपारा लोहमार्ग पोलीस ठाण्यात गुन्हा दाखल करण्यात आला आहे. त्याचा पोलीस शोध घेत आहेत.
मिळालेल्या माहितीनुसार, आरोपी सागरची पीडिता दुसरी पत्नी आहे. पहिली पत्नी मुलाबाळांसह सोडून गेल्यानंतर सागरने नोव्हेंबरमध्ये पीडितेशी लग्न केले. लग्नावेळी पीडिता ६ महिन्यांची गर्भवती होती. मुल नको या कारणावरुन या दाम्पत्यामध्ये नेहमी वाद व्हायचे. १५ नोव्हेंबरला बोरिवलीहून विरारला लोकलमधून जाताना दोघांमध्ये जोरदार वाद झाला. यावेळी पीडितेला मारहाण करुन आरोपी पतीने तिला चालत्या लोकलमधून बाहेर ढकलून दिले. धीम्या गतीची लोकल असल्याने जीव वाचल्याचे पीडितेने पोलिसांना दिलेल्या जबानीत म्हटले आहे. या माहितीच्या आधारे पोलीस आरोपी पतीचा शोध घेत आहेत.
हेही वाचा - पनवेल-वसई मार्गावर लोकलच्या 170 फेऱ्या लवकरच
