ठाणे - भिवंडी लोकसभेच्या मतदारसंघासाठी भाजप-शिवसेना-रिपाइं कार्यकर्त्यांचा मेळावा कल्याण पश्चिममध्ये आयोजित केला होता. या मेळाव्यात पत्रकारांनी पालकमंत्री एकनाथ शिंदेंना बाळूमामा निवडणूक लढवण्याच्या तयारीत आहे का? असा प्रश्न विचारताच पालकमंत्र्यांनी पत्रकारांनाच प्रतिप्रश्न विचारून घूमजाव केल्याचे दिसून आले आहे.
भिवंडी लोकसभेत शिवसेनेकडून बंडाचा झेंडा फडकवणाऱ्या ठाणे ग्रामीणचे संपर्कप्रमुख सुरेश म्हात्रे उर्फ बाळामामा यांनी लोकसभा निवडणूक लढवण्याची तयारी केल्याने भाजपच्या गोटात खळबळ उडाली आहे. विशेष म्हणजे गेल्या दोन वर्षापासून बाळामामा निवडणूक लढवण्याची तयारी केली आहे, मात्र भाजपने पुन्हा कपिल पाटील यांना युतीचे उमेदवार घोषित केले आहे. त्यामुळे गेल्या महिन्यापासून बाळामामा काँग्रेसकडून तिकिट मिळवण्यासाठी दिल्ली वारी करत आहेत. माजी खासदार सुरेश टावरे यांना काँग्रेसचे उमेदवार घोषित केल्याने आता बाळा मामा अपक्ष लढवण्याच्या मनस्थितीत आहेत. याच प्रश्नावर पत्रकाराने पालकमंत्री एकनाथ शिंदे यांना विचारले असता एकदा युतीने कपिल पाटील यांची घोषित केल्यावर त्यांचा प्रश्नच येत नाही तुम्हाला बाळामामाने सांगितले का? असा उलट प्रश्न विचारत पत्रकारांच्या प्रश्नाला उत्तर देणे टाळले, यामुळे आजही भाजप-शिवसेना दुरावा कायम असल्याचे दिसून आले आहे.
भर मिळाव्यात रिपाइं प्रदेश उपाध्यक्षची नाराजी
रिपाइंचे प्रदेश उपाध्यक्ष अण्णा रोकडे यांनी तर भर मेळाव्यात शिवसेना भाजपच्या दोन पालकमंत्री व पदाधिकाऱ्यांसमोर प्रचंड नाराजी व्यक्त केली. रोकडे यांनी भाषणात सांगितले की, रिपाइंचे राष्ट्रीय अध्यक्ष रामदास आठवले यांना तुम्ही मंत्री बनवले मात्र सर्वसामान्य रिपाइंच्या कार्यकर्त्याचा काय? असा सवाल उपस्थित करीत आमचे कोणी ऐकून घेत नाही, रिपाइंचा कार्यकर्ता तुमच्यासाठी झटतो, त्याला काही भेटत नाही तुमच्या पक्षाच्या लोकांना पदे दिली जातात, मात्र आमच्या कार्यकर्त्यांना एसीओ पद मिळत नाही खासदार श्रीकांत शिंदे यांनी तर आमच्या कार्यकर्त्यांबद्दल अजूनही सहानुभूती दाखवत नाही. त्यांनी आमच्या दलित वस्तीच्या नागरिक सुविधांचा निधीही दिला नाही. आम्ही तुम्हाला सहकार्य देतो मात्र आमच्यासारख्यांना मान द्या, असे सांगत त्यांनी प्रचंड युतीबाबत नाराजी व्यक्त केली आहे. कल्याण आणि भिवंडी लोकसभेत या नाराजीचा फटका युतीच्या उमेदवारांना बसण्याची शक्यता वर्तविण्यात येत आहे.
