ठाणे - उल्हासनगर शहरातील महावितरणच्या एका अधिकाऱ्याने वीज बिल भरण्याच्या रकमेचा अपहार केल्याचा प्रकार समोर आला आहे. याप्रकरणी मध्यवर्ती पोलीस ठाण्यात गुन्हा दाखल करण्यात आहे. वरिष्ठ तज्ज्ञ आशुतोष चिते, असे गुन्हा दाखल झालेल्या अधिकाऱ्याचे नाव आहे.
उल्हासनगर शहरातील अनेक भागात आरोपी चिते याने ग्राहकांकडून वीज बिल भरणा म्हणून लाखो रुपये रोख रक्कम आणि धनादेश घेतले. मात्र, ग्राहाकांकडून वीजबिलापोटी गोळा केलेली रोख रक्कम आणि धनादेश महावितरण कार्यालयात जमा केली नव्हती. त्यातच उल्हासनगर रेल्वे स्थानक रोड परिसरात राहणारे मोहन रामरख्याने यांचे ९ हजार वीजबिल थकले होते. त्यावेळी पाहणी करण्यासाठी आलेल्या महावितरणचे अधिकारी आशुतोष चिते यांना वीज ग्राहक मोहन यांनी थकीत रकमेचा धनादेश दिला. मात्र, ३ महिने उलटूनही मोहन यांनी दिलेला धनादेश महावितरण कार्यालयात जमा केला नसल्याची माहिती रामरख्याने यांना मिळाली.
हेही वाचा - कोरोना प्रभाव : १५ रुपयात किलोभर चिकन, कुक्कुटपालनाचा व्यवसाय डबघाईला
याबाबत त्यांनी मध्यवर्ती पोलीस ठाण्यात वरिष्ठ तज्ज्ञ चिते यांच्या विरोधात रक्कमेचा अपहार केल्याप्रकरणी गुन्हा दाखल केला आहे. दरम्यान, गुन्हा दाखल झालेले अधिकारी चिते यांनी मोहनसारख्या अनेक ग्राहकांच्या रकमेचा अपहार केल्याचे समोर आल्याची माहिती सूत्रांनी दिली आहे. याप्रकरणी मध्यवर्ती पोलीस अधिक तपास करत आहेत.
हेही वाचा - दरवर्षी बाप बदलणाऱ्यातले आम्ही नाही; आव्हाडांचा नाईकांवर निशाणा
