ठाणे - मानपाडा पोलीस कोठडीत असलेल्या एका आरोपीचा संशयास्पद मृत्यू झाल्याची खळबळजनक घटना घडली ( Molestation Accuse Dies In Judicial Custody ) आहे. विनयभंगाच्या एका प्रकरणात पोलिसांनी आरोपीला अटक केली होती. मात्र, त्याचा मृत्यू पोलिसांनी केलेल्या मारहाणीत झाल्याचा संशय व्यक्त करण्यात येत आहे.
भुसावळ येथून केली होती अटक
दत्तात्रय दिनकर वारके, असे मृत आरोपीचे नाव आहे. गेल्या वीस दिवसांपूर्वी दत्तात्रय वारकेवर मानपाडा पोलीस ठाण्यात विनयभंगाचा गुन्हा दाखल होता. पोलिसांनी त्याला शनिवारी जळगाव जिल्ह्यातील भुसावळ येथून अटक केली होती. काल ( रविवारी ) त्याला न्यायालयासमोर हजर करण्यात आले होते. त्यानंतर त्याला न्यायालयीन कोठडी सुनावण्यात आली होती. कारागृहात नेण्यापूर्वी कोरोना चाचणी बंधनकारक आहे. त्यामुळे वारकेला मानपाडा पोलीस ठाण्यातील विलगीकरण कक्षात ठेवले होते.
मृत वारकेला दारुचे व्यसन होते. दारु न मिळाल्याने तो अस्वस्थ झाला होता. रविवारी संध्याकाळी पोलिसांनी त्याला कोरोना चाचणीसाठी नेण्याची तयारी केली होती. तेव्हा त्याला अचानक जोराने फिट आली. त्यामुळे तो जमिनीवर डोक्याच्या दिशेने पडला. वारकेला जखमी अवस्थेत शास्त्रीनगर रुग्णालयात दाखल करण्यात आले. दोन तासाने त्याने उपचाराला प्रतिसाद दिला. मात्र, रात्री साडे आठच्या दरम्यान मृत्यू झाल्याची माहिती प्रशासनाने पोलिसांना दिली.
वारकेचा मृतदेह उत्तरणीय तपासणीसाठी मुंबईतील जेजे रुग्णालयात पाठवण्यात आला आहे. त्याचा अहवाल आल्यानंतर पुढील तपासाची दिशा ठरवण्यात येणार असल्याची माहिती डोंबिवली विभागाचे पोलीस अधिक्षक जे. डी मोरे यांनी दिली आहे.
हेही वाचा - पंतप्रधान मोदींनी राज्यपाल कोश्यारी यांची उचलबांगडी करावी - विनोद पाटील
