ठाणे- जीवघेण्या आपत्तींमध्ये फसलेल्या लोकांना वेळीच मदत पुरविण्यासाठी ठाणे महानगर पालिकेने आपत्ती व्यवस्थापन केंद्राची निर्मिती केली आहे. या आपत्ती व्यवस्थापन केंद्राची शहरालगत असलेल्या सर्वच भागांना मदत होत आहे. या केंद्रामुळे नैसर्गिक व जीवघेण्या आपत्तींपासून लोकांचे संरक्षण करण्याच्या कार्याला वेग आला आहे.
ठाणे शहरात इमारती कोसळण्याच्या घटना अनेक दशकांपासून होत आहेत. यात आतापर्यंत शेकडो लोकांचे जीव गेले आहेत. तर आग लागण्याच्या घटनांच्या सपाट्यात अग्निशामक दलातील कर्मचारीही सापडले आहेत. अशा दुर्घटनांमुळे ठाणे महानगरपालिकेने स्वतःचा आपत्ती व्यवस्थापन कक्ष तयार केला आहे. कोणतीही दुर्घटना असो तिची माहिती आधी व्यवस्थापन केंद्रात जाते व त्यानंतर संबंधित ठिकाणी कार्यवाही होते. शहरालगतच्या भिवंडी, मुंबई, कल्याण डोंबिवली उल्हासनगर, मीरा, भाईंदर, वसई या शहरांनासुद्धा ठाणे आपत्ती व्यवस्थापन कक्ष नेहमीच मदत होते. व्यवस्थापन कक्षाची आणखी एक मोठी जबाबदारी असते, ती म्हणजे समन्वयाची. इतर यंत्रणांबरोबर समन्वय ठेवण्याचे कामसुद्धा येथे अविरतपणे सुरू असते.
ठाण्यातील आपत्ती व्यवस्थापन केंद्राच्या कामकाजाचा आढावा घेण्यासाठी 'ईटीव्ही भारत'ने या केंद्राला भेट दिली. संतोष कदम आपत्ती व्यवस्थापन केंद्राचे प्रमुख आहेत. कदम यांनी भिवंडीच्या गोडाऊन व ठाण्यातील मुंब्रा येथील इमारतीत लागलेल्या जीवघेण्या आगीपासून लोकांची सुटका करण्याचे काम केले होते. त्यांच्या कामाचा अनुभव बघता कोणत्याही वेळी कोणत्याही घटनेला सामोरे जाण्यासाठी ते सज्ज असल्याचे दिसून येते. त्यांच्या याच स्वभावामुळे ठाणे महानगर पालिका आयुक्तांनी अनेकदा संतोष कदम यांची पाठ थोपटली आहे.
पावसाळ्याच्या दिवसात झाडे कोसळण्याची शक्यता जास्त असल्याचे कदम यांनी सांगितले. वाढत्या शहरीकरणामुळे माती कमी होऊन काँक्रीटीकरण वाढले असल्याने झाडांची मुळे कमजोर होऊन ती खाली पडत आहेत. अशा घटनांमध्ये नागरिकांचे जीव जात आहेत. या घटनांमुळे लोकांच्या मालमत्तेचेदेखील नुकसान होत आहे. या घटनांना रोखण्यासाठी आपन प्रयत्न करित असल्याचे त्यांनी सांगितले.
