ठाणे - जांभूळ पाणी शुद्धीकरण केंद्राच्या उल्हासनदीवरील बंधाऱ्यांची दुर्दशा झाली आहे. या बंधाऱ्याची संरक्षक भिंत धोकादायक अवस्थेत उभी असून कोणत्याही क्षणी अपघात होण्याची शक्यता आहे. बंधाऱ्या खालील मोरीचा एक भाग खचला असून गावकऱ्यांचा दळणवळणाचा मार्गही धोक्यात आहे. मागील पाच वर्षांपासून गावकरी हा जीवघेणा प्रवास करत आहेत.
उल्हासनदीवरील बंधाऱ्याची दुर्दशा
या बंधाऱ्यामुळे अंबरनाथ आणि कल्याण तालुक्यातील अनेक गावे जोडली गेली आहेत. जांभूळ, वसत गावातील ग्रामस्थांना आपटी मांजार्ली, गोवीली, टिटवाळाकडे जाण्यासाठी तर आपटी मांजार्ली, दहागाव पोई या ग्रामस्थांना अंबरनाथ-बदलापूर एमआयडीसीकडे जाण्यासाठी हा सर्वात जवळचा मार्ग आहे. मात्र, हा रस्ता धोकादायक झाल्याने गावकऱ्यांना २० ते २५ किलो मीटरचा वळसा घालून यावे लागत आहे.
