ठाणे - ३१ मार्चपर्यंत शेतमालाची वाहतूक करणाऱ्या वाहनांना २४ तास वाहतुकीला परवानगी देण्यात आली. शहरातून अवजड वाहनांना ठराविक वेळेतच वाहतुकीची परवानगी आहे. याचा फटका फळे आणि नाशवंत शेतमालाच्या वाहतुकीला बसत होता. नाशवंत असलेला हा माल वेळेत न पोहचल्याने खराब होई. याचा परिणाम शेतकरी आणि फळ व्यावसायिकांच्या उत्पन्नावर होतो. त्यामुळे शेतकऱ्यांचे नुकसान टाळण्यासाठी ठाणे शहर वाहतूक शाखेने फळ वाहतूकदारांना मोठा दिलासा देणारा निर्णय घेतला आहे. वाहतूक शाखेचे उपायुक्त अमित काळे यांनी याबाबत अधिसूचना जारी केली आहे.
मालवाहतूक करणाऱ्या अवजड वाहनांमुळे शहरात वाहतूक कोंडी होते. ही कोंडी सोडवताना वाहतूक पोलिसांची मोठी दमछाक होई. त्यामुळे मागील वर्षी १० सप्टेंबरपासून पोलीस आयुक्त विवेक फणसळकर यांनी एक अधिसूचना जारी केली होती.
हेही वाचा - राजा दिनकर केळकर वस्तू संग्रहालयाला १०० वर्ष पूर्ण; मात्र, जागेअभावी दुर्मिळ वस्तू नागरिकांच्या दृष्टीआड
या सूचनेनुसार मालवाहतूक करणाऱ्या सर्व प्रकारच्या अवजड वाहनांना ठाणे पोलीस आयुक्तालयाच्या हद्दीतील मार्गावरून दुपारी १२ ते ४ आणि रात्री ११ ते पहाटे ५ या वेळेत जाण्यास परवानगी होती. तसेच, जवाहरलाल नेहरू बंदर(जेएनपीटी), नवी मुंबईकडे ये-जा करणारी वाहने ठाणे शहरातील मुंब्रा बायपासमार्गेच जातील. कल्याण शहरातून जेएनपीटीकडे ये-जा करणारी वाहने रात्री ११ ते पहाटे ५ या वेळेत कल्याण फाटा मार्गे जाण्यास मुभा दिली होती. या निर्णयाचा फटका फळांची वाहतुकीला बसला.
ही बाब लक्षात आल्यानंतर शहर वाहतूक शाखेने या बाबत नवीन अधिसूचना काढून शेतीमालाच्या वाहतुकीला परवानगी दिली. मात्र, वाहनांची कडक तपासणी करूनच वाहने सोडली जातील. इतर वाहनांना अगोदरचेच वाहतूक नियम लागू राहतील, अशी माहिती वाहतूक शाखेचे उपायुक्त अमित काळे यांनी दिली.
