ठाणे: जिल्ह्यातील उद्योगपती रुद्र प्रताप त्रिपाठी यांनी कार्यक्रमाचे आयोजन केले होते. देशातील मध्य प्रदेश येथील छतरपूर जिल्हा भागातील बागेश्वर धाम ही संतांची भूमी म्हणून नावरूपास आली आहे. सध्याचे पीठाधीश्वर धीरेंद्र कृष्ण शास्त्री मागील आठ वर्षांपासून येथे येणाऱ्या सहस्त्र भाविकांशी संवाद साधतात. आठवड्यातून मंगळवारी आणि शनिवारी लाखो भाविक बागेश्वर धाममध्ये दर्शनासाठी गर्दी करतात.
भूमिपूजन सोहळा संपन्न: यापूर्वी ६ आणि ७ नोव्हेंबर रोजी बागेश्वर बाबाकडून भिवंडीत दिव्य बालाजी दरबाराचे आयोजन करण्यात आले होते. प्रसंगी प्रसिद्ध उद्योगपती रुद्र प्रताप त्रिपाठी यांनी इंडियन कॉर्पोरेशन माईल स्टोन येथे बागेश्वर धाम मंदिर आणि आश्रम उभारण्याचा संकल्प केला होता. याआधारे आज सोमवारी येथे भूमिपूजनाचा कार्यक्रम पार पडला. भिवंडी तालुक्यात बागेश्वर धाम बालाजी मंदिर आणि आश्रम भूमिपूजन सोहळा बालाजी सरकार धीरेंद्र कृष्ण शास्त्री यांच्या हस्ते अंजुरदिवे येथील गोदाम पट्ट्यात असलेल्या इंडियन कॉर्पोरेशन येथे पार पडला. यावेळी आमदार रवी राणा आणि खासदार मनोज तिवारी देखील उपस्थित होते.
तिवारींची कॉंग्रेस नेत्यावर टीका: यावेळी भाजप नेते मनोज तिवारी यांनी सांगितले कि, आश्रमासाठी उद्योगपती रुद्र प्रताप त्रिपाठी यांनी जागा उपलब्ध करून दिल्याने सनातन धर्मासाठी मोठे स्थान भिवंडीत उभे राहील. विशेष म्हणजे महाराष्ट्र ही आधीपासूनच संतांची भूमी आहे. त्यामध्ये आज एका मंदिराचे भूमिपूजन झाले ही आनंदाची गोष्ट आहे. कॉंग्रेस नेत्याचे नाव न घेता त्यांनी टीका करत सांगितले कि, जी लोकं विरोध करत आहेत ते अनपड आहेत. भगवान श्रीरामांच्या नावावरून चिडणारे लोक याला विरोध करतात. सनातन धर्माला कीड बोलणारेच किडे असतात. अशाप्रकारे सनातन धर्मावर प्रश्न उचलणारे संपून जातात, असे बालाजी सरकार धीरेंद्र कृष्ण शास्त्रींवर टीका करणाऱ्या कॉंगेस नेत्यावर भाजप नेते मनोज तिवारी यांनी केली.
