ठाणे : मुरबाड शहरानजीक असलेल्या डोहळ्याचा पाडा येथिल फार्म हाऊसवर हि घटना घडली आहे. याप्रकरणी मुरबाड पोलीस ठाण्यात हत्येसह विविध कलमानुसार गुन्हा दाखल करून फरार हल्लेखोर भरत मधुकर हरड याचा शोध सुरु केला आहे. तर चंदना चेतन बांगर वय 32 असे हल्ल्यात मृत्यू झालेल्या आईचे नाव आहे. तर श्रावणी चेतन बांगर वय 6 असे गंभीर जखमी असलेल्या मुलीचे नाव असून या हल्ल्यात शेजारील सुरक्षा रक्षक पन्नालाल यादव वय 50 हाही जखमी झाला आहे. मात्र या घटनेने संपूर्ण मुरबाड तालुक्यात खळबळ उडाली असून सर्वत्र दहशतीचे वातावरण पसरले आहे.
कोयत्याने वार करत घटनास्थळावरुन पसार : याबाबत सविस्तर वृत्त असे की, बारवी धरणाच्या पाण्याखाली गेलेल्या तोंडली येथिल चेतन बांगर हे मुरबाड शहरानजिक असणाऱ्या डोहळ्याचा पाडा येथील एका नातेवाईकाच्या फार्म हाऊसवर मृत पत्नी चंदना आणि मुलगी श्रावणी यांच्यासह वास्तव्य करीत होते. त्यातच हल्लेखोर हा चहा पिण्याच्या बहाण्याने घरात घुसला होता. त्यानंतर अचानक त्याने मृत चंदनाकडे १० हजार रुपयांची मागणी केली. त्या आदीच बेडरूंममध्ये खेचुन घेऊन जात चंदना यांच्यावर कोयत्याने हल्ला केला. आईचा आरडाओरडा एकूण मुलगीही आईला वाचविण्यासाठी आली असता, हल्लेखोराने दोघी माय लेकीवर कोयत्याने सपासप वार केले. तर दुसरीकडे मायलेकींचा आक्रोश पाहून शेजारी असलेल्या फार्म हाऊसवरील सुरक्षा रक्षकाने घटनास्थळी धाव घेत, हल्लेखोराला पकडण्याचा प्रयत्न केला. मात्र हल्लेखोर भरतने सुरक्षा रक्षक पन्नालाल यादव याच्याही हातावर कोयत्याने वार करत घटनास्थळावरुन पसार झाला.
शासकीय मध्यवर्ती रुग्णालयात दाखल : या तिघांचा आक्रोश पाहून परिसरातील नागरिक घटनास्थळी धावत येऊन त्यांनी माय लेकींना गंभीर अवस्थेत मुरबाड ग्रामीण रुग्णालयात उपचारासाठी दाखल केले. दोघीची प्रकृती चिंताजनक असल्याने पुढील उपचारासाठी उल्हासनगरमधील शासकीय मध्यवर्ती रुग्णालयात दाखल केले. मात्र गुरुवारी उपचारादरम्यान चंदना यांचा मृत्यू झाला. मात्र मृत्यूपूर्वी त्यांनी हल्लेखोराचे नाव नातेवाईक सांगितले होते. तर मुलगी श्रावणीवर गंभीर जखमी असल्याने तिच्यावर कल्याण येथील खासगी रुग्णालयात उपचार सुरू आहे. दिवसाढवळ्या घडलेल्या या प्रकारामुळे मुरबाड शहरात खळबळ माजली आहे.
पोलिसांच्या तपासावर प्रश्न उपस्थित : हल्लेखोर भरत मधुकर हरड हा मुरबाड तालुक्यातील साजई गावातील रहिवाशी असून त्याच्या शोधासाठी मुरबाड पोलीस व ठाणे ग्रामीण गुन्हे शाखेचे पथके समांतर तपास गेल्या ४८ तासापासून करीत आहेत. तर दुसरीकडे हल्लेखोर आरोपी भरतला अद्यापही पोलिसांनी अटक केली नसल्याने नागरिकांनी पोलिसांच्या तपासावर प्रश्न उपस्थित करून आरोपीला अटक करण्याची मागणी केली. तसेच आरोपीला अटक केल्यानंतरच हल्ल्याचे कारण समोर येणार असल्याचे सांगण्यात आले. या प्रकरणाचा तपास सहायक पोलीस निरीक्षक अनिल सोनोने हे करीत आहेत.
हेही वाचा : Karnataka Crime News : प्रेमाला नकार दिला म्हणून फेकले अ‍ॅसिड!, आरोपीला अटक
