ठाणे- भरधाव कारने गॅस टँकरला पाठीमागून जोरदार धडक दिल्याने भीषण अपघात झाला. या अपघातात कारमधील दोन जण जागीच ठार झाले असून दोन जण गंभीर जखमी झाले. ही घटना आज सकाळी मुंबई-नाशिक महामार्गावरील आसनगाव परिसरात असलेल्या परिवार गार्डन हॉटेलसमोर घडली.
घटनेची माहिती मिळताच महामार्ग पोलिसांनी घटनास्थळी धाव घेऊन कारमधील गंभीर अवस्थेत असलेल्या ४ जखमींना शहापूरच्या उपजिल्हा रुग्णालयात दाखल केले. मात्र, यापैकी दोघांचा मृत्यू झाला आहे. मृतांमध्ये एका तरुणीचा आणि तरुणाचा समावेश आहे. तर, अपघातग्रस्त कार राजस्थान पासिंगची असून ती टुरिस्ट कार आहे.
