ठाणे - भिवंडी शहरातील कसाईवाडा येथे ३१ वर्षीय तरुणीवर दोघा नराधमांनी तीन महिन्यांपूर्वी सामूहिक अत्याचार केल्याची धक्कादायक घटना समोर आली आहे. सादीन अंसारी (वय २५ ) आणि खालीद अंसारी अशी आरोपींची नावे आहेत. निजामपूर पोलिसांनी या दोघांविरोधात गुन्हा दाखल करून त्यांना अटक केली आहे.
मिळालेल्या माहितीनुसार, पीडित तरुणी भिवंडीतील कुरेशी नगरमधील एका इमारतीत राहते. त्यांच्याच मालकीची एक खोली शेजारच्या इमारतीतदेखील आहे. तीन महिन्यांपूर्वी तरुणी तिथे अंघोळीसाठी गेली असता, नराधम सादीन आणि खालीद यांनी तिच्यावर अत्याचार केला होता. भयभीत झालेल्या तरुणीने या घटनेची कुठेही वाच्यता केली नव्हती.
हेही वाचा - मुंबईत पोक्सो अंतर्गत बलात्काराच्या गुन्ह्यात वाढ; प्रजा फाऊंडेशनच्या अहवालात खुलासा
दरम्यान, गेल्या तीन महिन्यांच्या कालावधीत मुलीच्या शारीरिक प्रक्रीयेत बदल झाल्याने तिच्या आईने तिला विश्वासात घेऊन सखोल चौकशी केली असता, घडलेला प्रकार उघड झाला. मुलीच्या आईने मंगळवारी मुलीला निजामपूर पोलीस ठाण्यात नेऊन दोन्ही आरोपींविरोधात गुन्हा दाखल केला आहे. गुन्हा दाखल होताच निजामपूर पोलीस ठाण्याचे पोलीस निरीक्षक शंकर इंदलकर यांनी दोघा नराधमांना अटक करून बुधवारी ठाणे जिल्हासत्र न्यायालयात हजर केले. न्यायालयाने त्यांना ३० नोव्हेंबरपर्यंत पोलीस कोठडी सुनावली आहे.
