सोलापूर - आजपर्यंत तुम्ही अनेक विवाह सोहळे पाहिले असतील. मात्र, आज पंढरपूर येथे विठ्ठल आणि रुक्मिणीचा विवाह सोहळा पडत आहे. वसंत पंचमीच्या मुहूर्तावर सनई-चौघड्यांच्या सुरात हा विवाह सोहळा पार पडणार आहे. त्यानिमित्त श्री विठ्ठल रुक्मिणी मंदिर समितीतर्फे विठ्ठल-रुक्मिणीमातेच्या गाभाऱ्यास विविध फुलांनी सुंदर अशी सजावट करण्यात आली आहे.
वसंत पंचमी ते रंगपंचमीपर्यंत विठ्ठल-रुक्मिणी विवाह सोहळा पार पाडला जातो. या दिवशी देवाला शुभ्र पोशाख करून मूर्तीवर गुलालाची उधळण करण्याची परंपरा आहे.
आज सकाळपासून पंढरपुरात या आगळ्यावेगळ्या विवाहाची धामधूम सुरू झाली आहे. देवाच्या या विवाहसोहळ्याला हजेरी लावण्यासाठी राज्यभरातून हजारो भाविकांनी पंढरीत गर्दी केली आहे. या विवाहसोहळ्यासाठी विविध रंगांच्या रंगीबेरंगी फुलांनी मांडव अर्थात विठुरायाचे राऊळ सजवले जाते.
