सोलापूर : सोलापूर हैदराबाद महामार्गावर असलेल्या मुळेगाव रोडवरील सोनांकूर एक्सोर्ट प्रायव्हेट लिमिटेड या कंपनीसह आसरा चौक, कुमठा नाका, हैदराबाद रोडवरील भंगार विक्रेते, बांधकाम साहित्य, स्टील विक्रेत्यांवर आयकर विभागाने सोमवार ते गुरुवार असे चार दिवस छापे टाकले. या छाप्यांमध्ये सुमारे ५० कोटी रुपयांचे बोगस व्यवहार आढळून आल्याची माहिती आयकर विभागाच्या सुत्रांनी दिली आहे. तब्बल चार दिवस एकाच वेळी अचानकपणे धाडी पडल्या होत्या. व्यापाऱ्यांना व व्यवसायिकांना काही समजण्या अगोदर आयकर खात्याच्या अधिकाऱ्यांनी धाड टाकून कारवाई केली आहे.
शहरातील भंगार व्यवसायिकांवर कारवाई : आयकर विभागाने दोन महिन्यांपूर्वी शहरातील विविध रुग्णालयांवर छापेमारी करत शंभर कोटींवर घबाड जप्त केला होता. या कारवाईत शहरातील रुग्णालयांवर दंडात्मक कारवाई झाली होती. शहरातील रुग्णालयावर झालेल्या कारवाईत 100 कोटींचा गैरप्रकार समोर आला होता. सोमवार ते गुरुवार असे चार दिवस आसरा चौक परिसर, हैदराबाद रोड, कुमठा नाका परिसरात बीफ, भंगार विक्री, बांधकामाचे साहित्य विक्री करणाऱ्या व्यावसायिकांवर छापेमारी झाली. या व्यावसायिकांनी भंगार, साहित्य विक्रीमध्ये मोठ्या प्रमाणावर रोखीने खरेदी करत, टॅक्स चोरला असल्याची धक्कादायक माहिती समोर आली आहे.
50 कोटी रुपयांची तफावत आढळली : सोलापुरात झालेल्या कारवाईत व्यवसायिक व व्यापारी यांमध्ये झालेल्या व्यवहारांमध्ये सुमारे ५० कोटी रुपयांची तफावत आढळून आली आहे. भंगार विक्रेत्यांनी खरेदी दर कमी दाखविले आहेत. आयकर अधिकाऱ्यांनी कच्च्या नोंदी असलेली कागदपत्रे ताब्यात घेतली आहेत. रोखीच्या व्यवहारातून मोठ्या प्रमाणावर करचोरी झाली आहे. ही करचोरी कधीपासून झाली, या करचोरीमध्ये इतर कोण-कोण सहभागी आहेत, याची तपासणी सुरू आहे.
नागपूरमध्ये 12 ठिकाणी धाडी : नागपूरमध्ये 4 नोव्हेंबर 2022 रोजी आयकर विभागाच्या पथकांनी एकाच वेळी पिनॅकल ग्रुपच्या ८ ठिकाणी, विठोबा ग्रुपच्या २ ठिकाणी आणि मगनमल हिरामल ग्रुपच्या २ ठिकाणांवर धाडी टाकल्या होत्या. पिनॅकल ग्रुप टेक्नॉलॉजी, मार्केटिंग आणि मेसेजिंग सर्व्हिसेस क्षेत्रात कार्यरत आहे. पिनॅकल ग्रुपचे कार्यालय गुडगावमध्ये आहे. विठोबा ग्रुपच्या नागपूरमधील एमआयडीसी स्थित असलेल्या फॅक्टरी आणि तीन पाटर्नसच्या ठिकाणांवर धाड टाकण्यात आली होती. विठोबा उद्योग समूहाला माल पुरवठा करणारी फर्म मगनमल हिरामलच्या घरासह आणि इतवारी स्थित असलेल्या दुकानावरही आयकर विभागाने कारवाई केली होती.
हेही वाचा : IT raids in Pune : चॉईस ग्रुप आयकर विभागाची छापेमारी; केंद्रीय अधिकाऱ्यांकडून छापेमारी
