सिंधुदुर्ग- चालकाचा अचानक ताबा सुटल्याने मैद्याने भरलेला ट्रक करूळ घाटात खोल दरीत कोसळला. या अपघातात ट्रक चालक गंभीर जखमी झाला. वैभववाडी पोलीस ठाण्याचे कॉन्स्टेबल संदीप राठोड यांनी त्याला दरीतून बाहेर काढून त्याचे प्राण वाचवले. ही घटना आज संध्याकाळी चारच्या सुमारास घडली होती. ट्रक दोनशे फूट दरीत कोसळल्याने त्याचा चक्काचूर झाला आहे, तर मैद्याचेही मोठ्या प्रमाणात नुकसान झाले आहे.
अपघाताची माहिती मिळताच करूळ चेक पोस्टवरती ड्युटीवर असलेले पोलीस कॉन्स्टेबल संदीप राठोड यांनी घटनास्थळ गाठले. क्षणाचाही विलंब न करता ते दरीत उतरले. त्यांनी जखमी अवस्थेत असलेल्या ट्रक चालकाच्या अंगावरील दगड हटवला व चालकाला दरीतून बाहेर काढले. मागील वर्षी देखील कॉन्स्टेबल राठोड यांनी दरीत अडकलेल्या एका ट्रक चालकाला मोठ्या शिताफीने बाहेर काढले होते.
अपघातात ट्रक चालकाच्या पायाला गंभीर दुखापत झाली आहे. त्याला उपचारासाठी कोल्हापूर येथील खाजगी रुग्णालयात हलवण्यात आले आहे. यावेळी वैभववाडी पोलीस ठाण्याचे पोलीस निरीक्षक अतुल जाधव घटनास्थळी हजर होते. गगनबावडा पोलीसही घटनेची माहिती मिळताच घटनास्थळी दाखल झाले होते. घटनेचा अधिक तपास वैभववाडी पोलीस करत आहे.
हेही वाचा- आरटी-1 वाघ पिंजऱ्यातुन पळाला; वनविभागाची डोकेदुखी वाढली
