सातारा : कोल्हापूरहुन पुण्याकडे कुरिअर घेऊन जाणाऱ्या पिकअप गाडीचा थरारक पाठलाग करून सशस्त्र लुटारूंनी गाडीतील ७ किलो सोने-चांदीच्या विटांची लूट करून पलायन केले. पुणे-बंगळुरू महामार्गावर बोरगाव (ता. सातारा) हद्दीत मध्यरात्रीच्या सुमारास ही थरारक घटना घडली. लुटारूंचा पाठलाग करताना पोलिसांना पिकअप गाडी सापडली, मात्र मुद्देमाल घेऊन संशयित पसार झाले.
लूट करून दरोडेखोर पसार : कोल्हापूर येथील एका कुरिअर कंपनीचे कर्मचारी मध्यरात्री अडीचच्या सुमारास पिकअप गाडीतून सोन्याच्या विटा, चांदी घेऊन पुण्याला निघाले होते. कुरिअरची गाडी बोरगाव हद्दीत आल्यानंतर पाच सशस्त्र दरोडेखोरांनी पिकअप गाडीचा थरारक पाठलाग करून गाडी थांबवली. शस्त्राचा धाक दाखवून अंदाजे सात किलो वजनाच्या सोने-चांदीच्या विटांची लूट करून दरोडेखोर पसार झाले.
पिकअप गाडी सापडली, दरोडेखोर निसटले : या धाडसी दरोड्याची माहिती मिळताच बोरगाव पोलीस तसेच स्थानिक गुन्हे शाखेच्या पोलिसांनी जिल्ह्यात नाकाबंदी केली. एक पथक पुण्याच्या दिशेने रवाना केले. लुटारूंचा पाठलाग करताना पोलिसांना पिकअप गाडी महामार्गावर सापडली, मात्र सोने-चांदी घेऊन दरोडेखोर इनोव्हा कार, दुचाकीवरून पसार झाले. बोरगाव पोलीस ठाण्याच्या हद्दीत दरोड्याचा हा थरार घडला.
भांडूपमध्ये विद्यार्थ्याचा खुन : मित्राला झालेल्या मारहाणीनंतर गॅंग विरोधात पोलिसांत साक्ष दिल्याच्या रागातून चाैघांनी १९ वर्षीय विद्यार्थ्यावर भररस्त्यात कटरने हल्ला केल्याची घटना गुरुवारी रात्री भांडूपमध्ये घडली. याप्रकरणी भांडूप पोलिसांनी अनिकेत गायकवाड नावाच्या एका आरोपीला अटक केली आहे. त्याच्यावर हत्येच्या प्रयत्नाचा गुन्हा दाखल करण्यात आला आहे.
गँग विरुध्द साक्ष दिल्याने हल्ला : भांडूप पश्चिमेकडील हनुमान नगर परिसरात रहात असलेला शुभम पाठक (१९) हा ठाण्यातील एका फार्मसी काॅलेजमध्ये शिक्षण घेत आहे. गेल्यावर्षी डिसेंबर महिन्यात शुभमचा मित्र फैजल याला पोलीस अभिलेखावरील आरोपी सुजल जाधव याने मारहाण केली होती. फैजलच्या तक्रारीवरुन भांडूप पोलिसांनी जाधव विरोधात गुन्हा दाखल केला. या गुन्ह्यात शुभमने जाधव विरोधात साक्ष दिली होती. याचाच राग जाधवला होता. तू आमच्या गँग विरुध्द साक्ष देतोस, मी सुटुन आल्यानंतर बघुन घेईन अशी धमकी त्याने शुभमला दिली होती. पूढे जाधवला या गुन्ह्यासह अन्य गुन्ह्यात अटक करण्यात आली. नुकताच तो सुटून जेल बाहेर आला. त्यावेळी त्याने शुभमवर हल्ला केल्याची माहिती मिळते आहे.
हेही वाचा -
Spanish Woman Molesting Case: स्पॅनिश पर्यटक महिलेचा विनयभंग करणाऱ्या मॅनेजरला दोन वर्षांचा कारावास
Terrorists Killed in Manipur : मणिपूर हिंसाचारानंतर आतापर्यंत 30 दहशतवादी ठार, आसाम रायफल्सची कारवाई
Mumbai Crime : गँगविरोधात साक्ष दिल्याने काॅलेज तरुणावर कटरने सपासप वार
