कराड (सातारा) - कोरोनाच्या पार्श्वभुमीवर कराड शहर पोलीस ठाण्यातील वाहतूक नियंत्रण शाखा आणि नगरपालिकेच्या पथकाने संयुक्त कारवाई करत नियमांचे उल्लंघन करणाऱ्यांकडून एका दिवसात 1 लाख 88 हजारांचा दंड वसूल केला. जिल्हाधिकाऱ्यांच्या आदेशाचा भंग करून मास्कविना फिरणे, दुचाकीवरून डबलसीट आणि चारचाकी गाडीतून तीनपेक्षा जास्त व्यक्तींची वाहतूक करणाऱ्या विरोधात कारवाई केली जात आहे.
870 जणांवर मोटार वाहन कायदा तसेच आपत्ती व्यवस्थापन कायद्यांतर्गत पोलिसांकडून कारवाई करण्यात आली. या कारवाईत 1 लाख 88 हजार रूपयांचा दंड वसूल झाला. कोरोनाचा संसर्ग टाळण्यासाठी दोन व्यक्तींमध्ये सामाजिक अंतर राखा, मास्क आणि सॅनिटायझरचा वापर करा, दुचाकीवरून डबल सीट न फिरू नका, तीनचाकी, चारचाकी वाहनामधून तीनपेक्षा जास्त लोकांची वाहतूक करू नका, अत्यावश्यक कारणांशिवाय घराबाहेर पडू नका, असे आवाहन प्रशासनाने केले आहे.
