सातारा - शहरात यापूर्वी ३ व ५ किलोमीटर परिसरात कोअर आणि बफर झोन होते. यापुढे विशेषत: शहरी भागात स्थानिक परिस्थितीनुसार हे क्षेत्र निश्चित करण्यात येईल. नव्या कंटेनमेंट झोनमध्ये कोणत्याही प्रकारच्या सवलती राहणार नाहीत. औषधे, भाजी, दूध आदींची घरपोहोच व्यवस्था सध्याप्रमाणे सुरू राहील. शहराच्या इतर नाॅन कंटेनमेंट क्षेत्रात त्यावेळच्या निर्देशांनुसार हालचालींना सवलत राहील, अशी माहिती जिल्हाधिकारी शेखर सिंह यांनी दिली. नियोजन भवनात आयोजित पत्रकार परिषदेत ते बोलत होते.
शहरी आणि ग्रामीण नाॅन कंटेनमेंट क्षेत्रात दुचाकी व चारचाकी वाहनांना अध्यादेश आल्यानंतर परवानगी दिली जाईल. दुचाकीवर फक्त एक आणि चारचाकीत चालक अधिक दोन जण अशाच प्रवाशांना खासगी वापरास परवानगी असेल. माॅल्स, व्यापारी संकुले आदी ठिकाणी कापड, सराफा दुकाने आदी प्रकारची अत्यावश्यक नसलेली दुकाने उघडता येणार नाहीत. फक्त औषधे, फळे-भाजीपाला, किराणा, कृषीशी निगडित दुकाने, ट्रॅक्टर दुकाने लवकरच सुरू करण्यात येतील, असेही ते म्हणाले.
बाजारपेठेशिवाय रहिवासी भागात सर्व प्रकारची दुकाने सुरू करता येऊ शकतील. मुख्य बाजारपेठेत मात्र अत्यावश्यक बाबींचीच दुकाने सुरू राहतील. प्रांत, मुख्याधिकारी य संदर्भात एकत्रित निर्णय घेतील, असेही जिल्हाधिकाऱ्यांनी स्पष्ट केले.
नोकरी-व्यवसायानिमित्त मोठ्या संख्येने सातारा जिल्ह्याचे तरुण-तरुणी पुण्या-मुंबईत आहेत; ते जिल्ह्यात येऊ इच्छितात. मात्र, त्यांची मोठी संख्या लक्षात घेता सध्यातरी त्यांना जिल्ह्यात प्रवेश देता येणार नाही. सातारा जिल्ह्यात मद्य विक्रीची दुकाने खुली करण्याबाबत अद्याप विचार नाही. सध्यातरी दुकाने बंदच राहतील. भविष्यात धोरण जाहिर केले जाईल, असेही त्य‍ांनी सांगितले. पत्रकार परिषदेत पोलीस अधीक्षक तेजस्वी सातपुते उपस्थित होत्या.
