कराड (सातारा) - जीमला निघालेला दुचाकीस्वार तरूण अज्ञात वाहनाच्या धडकेत जागीच ठार झाला. कराड-पाटण मार्गावरील विजयनगर (ता. कराड) येथे बुधवारी पहाटे ही घटना घडली. हणमंत भीमसेन ईटकर (वय 27) असे मृत तरूणाचे नाव आहे. दरम्यान, कराड-पाटण मार्गावर दाट धुके होते. त्यामुळे हा अपघात झाल्याची चर्चा आहे. या अपघाताची नोंद कराड शहर पोलीस ठाण्यात झाली आहे.
हणमंत ईटकर हा तरूण विवाहित असून त्याच्या पश्चात पत्नी, एक मुलगा आणि एक मुलगी आहे. तो गवंडी काम करतो. कर्नाटकातील उडपी परिसरात तो काम करत होता. काही दिवसांपुर्वीच तो विजयनगरमधील बालाजी कॉलनीत आपल्या कुटुंबीयांकडे आला होता. तसेच दोन दिवसांपासून तो विमानतळ-मुंढे येथील जीमला जात होता.
बुधवारी पहाटे तो त्याच्या मोटरसायकलवरून जीमला निघाला असताना, अज्ञात वाहनाने त्याच्या मोटरसायकलला धडक दिली. यात त्याचा जागीच मृत्यू झाला. घरापासून अवघ्या काही अंतरावर त्याचा अपघात झाला. अपघाताची नोंद कराड शहर पोलीस ठाण्यात झाली असून उपनिरीक्षक भरत पाटील हे पुढील तपास करत आहेत.
हेही वाचा - अज्ञात वाहनाच्या धडकेत बिबट्याच्या पिल्लाचा मृत्यू
हेही वाचा - कृष्णा-कोयनेचा प्रीतिसंगम हरवला धुक्यात.. कराडकरांनी लुटला गुलाबी थंडीचा आनंद
