सांगली - महापुराचा फटका भाजीपाल्यांनाही बसला आहे. त्यामुळे सांगलीमध्ये भाजीपाल्यांचे दर गगनाला भिडले आहेत. 40 ते 50 रुपये किलो असणारे भाजीपाल्यांचे दर आता दीडशे रुपयांच्यापुढे पोहोचले आहेत. हे दर पुढील तीन महिन्यांपर्यंत असेच राहतील, असा अंदाज भाजीपाला विक्रेत्यांकडून व्यक्त करण्यात येत आहे. त्यामुळे सांगलीकरांना पुढील काही महिने भाजीपाल्यांपासून दोन हात दूरच राहावे लागणार आहे.
सांगलीच्या महापुराचा फटका भाजीपाल्यावर मोठ्या प्रमाणात आता दिसून येऊ लागला आहे. सांगलीचे जनजीवन पूर्वपदावर जसे-जसे येत आहे, तसे भाजीपाल्याचे दर गगनाला भिडू लागले आहेत. प्रामुख्याने वांगी, दोडका, कोबी, फ्लॉवर, ढबु मिरची, देशी काकडी यासह मेथी, पालक, कोथिंबीर अश्या रोजच्या वापरात असणारे भाजीपाल्यांचे दर कडाडले आहेत.
सांगलीच्या बाजारात होणारी कमी आवक आणि वाढत चाललेली मागणी यामुळे हे दर वाढत आहेत.
एक नजर सांगलीच्या भाजी मंडईतील आजच्या दरांवर -
- वांगी - 160 ते 180 रुपये किलो
- दोडका - 80 ते 100 रुपये किलो
- भेंडी - 80 रुपये किलो
- गवारी - 100 ते 120 रुपये किलो
- दुधी भोपळा - 50 ते 60 रुपये किलो
- देशी कोकडी - 100 रुपये किलो
- मेथीची पेंडी -20 रुपये
- कोथिंबीर - 20 रुपये
सांगली शहरात मोठ्या प्रमाणात वारणा, कृष्णकाठ येथून उत्पादन होणारा भाजीपाला विक्रीस येतो. सध्या वारणा आणि कृष्णाकाठ आता महापुरामुळे उद्धवस्थ झाला आहे. तसेच पुढील तीन महिने भाजीपाल्यांचे उत्पादन शक्य नसल्याने आणखी तीन महिने या भाजीपाल्यांचे दर असेच राहतील असा अंदाज भाजीपाला विक्रेत्यांकडून व्यक्त करण्यात येत आहे.
अशीच परिस्थिती इतर भाजीपाल्यांचीही आहे. त्यामुळे सर्वसामान्य नागरिकांच्या जीवनावर याचा मोठा परिणाम होणार आहे.
