सांगली - पलुस तालुक्यातील अंकलखोप गावात मुलानेच आपल्या जन्मदात्याची हत्या केल्याचा धक्कादायक प्रकार घडला आहे. घरगुती वादातून मुलाने ही हत्या केली आहे.
वडिलांच्या हत्येनंतर मुलगा किशोर वारे (21) हा पसार झाला आहे. तर प्रकाश वारे (52) असे हत्या करण्यात आलेल्या व्यक्तीचे नाव आहे.
हेही वाचा... हिंगणघाट जळीत प्रकरण : पीडितेने रुग्णालयात नेताना व्यक्त केली होती 'ही' भावना
सोमवारी रात्री साडेआठच्या सुमारास येथील विठ्ठलनगर पुनर्वसन वसाहतीमध्ये राहणाऱ्या प्रकाश वारे व त्यांचा मुलगा किशोर वारे यांच्यात घरगुती कारणातून जोरदार भांडण झाले. वाद विकोपाला गेल्यानंतर किशोरने वडिलांच्या छातीवर डाव्या बाजुस धारदार शस्त्राने वार केले. वार खोलवर झाल्याने प्रकाश महादेव वारे (५२) यांचा जागीच मृत्यु झाला. हत्येनंतर मुलगा किशोर वारे (२१) हा घटनास्थळावरून पसार झाला. मृत प्रकाश वारे शेतमजुरी करत होते. त्यांना दोन मुले आहेत. त्यांच्या पत्नीचे दोन वर्षांपुर्वी निधन झाले होते. हत्येच्या घटनेनंतर भिलवडी पोलिसांनी घटनास्थळी धाव घेत पंचनामा केला. तसेच आरोपीचा शोध सुरु केला आहे.
हेही वाचा... औरंगाबादेत सातवीतील विद्यार्थिनीला शिक्षकानेच दाखवले पॉर्न व्हिडिओ; गुन्हा दाखल
