सांगली - महापालिकेतील भाजपचे महापौर आणि उपमहापौर यांनी पक्षाच्या आदेशानुसार राजीनामा दिला आहे. कार्यकाळ संपल्याने तसेच पक्षाच्या आदेशानुसार हे राजीनामे देण्यात आले आहेत. त्यामुळे अनेक दिवस सुरू असणाऱ्या चर्चांना पूर्णविराम मिळाला आहे.
सांगली, मिरज आणि कुपवाड महापालिकेवर भाजपची सत्ता होती. मिरजच्या नगरसेविका संगीता खोत यांची महापौर तर सांगलीचे नगरसेवक धीरज सूर्यवंशी यांची उपमहापौर पदी निवड झाली. महापौर व उपमहापौरांच्या निवड प्रक्रियेवेळी दोन्ही पदाधिकाऱ्यांना सव्वा वर्षांची मुदत देण्यात आली. ही मुदत संपल्यानंतरही महापौर आणि उपमहापौर यांनी राजीनामे दिले नाहीत. यामुळे काही इच्छुकांनी पक्ष श्रेष्ठींवर दबाव टाकत पदाधिकारी बदलण्याची मागणी केली.
भाजपचे प्रदेशाध्यक्ष चंद्रकांत पाटलांनी संगीता खोत आणि धीरज सूर्यवंशी यांनी राजीनामा देण्याचे आदेश दिले. यानुसार आज महापालिकेच्या सभेत संगीता खोत आणि धीरज सूर्यवंशी यांनी आपल्या पदाचा राजीनामा दिला. राजीनाम्यानंतर संगीता खोत यांनी जनतेची सेवा करायला मिळाल्याने आभार व्यक्त केले.
कोण बसणार खुर्चीवर ?
महापौर व उपमहापौर यांच्या राजीनाम्यानंतर आता राजकीय हालचालींना वेग येणार आहे. महापौर पदासाठी सविता मदने आणि गीता सुतार यांसह कल्पना कोळेकर भाजपकडून प्रबळ दावेदार मानले जात आहेत. आता पक्षाकडून कोणाला संधी मिळणार, हे पाहाणे औत्सुक्याचे असणार आहे.
