सांगली - महानगरपालिकेची ऑनलाईन सभा गुरुवारी पार पडली. मात्र, ऑफलाइन सभेच्या मागणीवरून ही सभा तहकूब करावी लागली. सत्ताधारी भाजपाचे भानगडीचे विषय ऑनलाइन सभेत मंजूर करण्यात येत असल्याचा आरोप करत विरोधाकांनी ऑफलाइन सभेची मागणी केली. 23 डिसेंबरपर्यंत सभा तहकूब करण्यात आली आहे.
तांत्रिक अडचणी आणि भानगडीचे विषय -
सांगली, मिरज आणि कुपवाड शहर महानगरपालिकेची मासिक सभा गुरुवारी पार पडली. कोरोनाच्या पार्श्वभूमीवर ऑनलाइन महासभा भरवण्यात आली. मात्र, आता ऑनलाइन ऐवजी ऑफलाइन सभा घेण्याची मागणी ऐरणीवर आली. महापौर गीता सुतार यांच्या अध्यक्षतेखाली सुरू झालेल्या ऑनलाइन सभेत अनेक नगरसेवकांना सभेत विषय मांडताना तांत्रिक अडचणी आल्या. याशिवाय उपसूचनेद्वारे ऐनवेळी जागा भाड्याने देणे, ऑनलाइन सभेत घोटाळ्याचे विषय मांडणे, याव्यतिरिक्त भूखंड विक्रीचा डाव सुरू असल्याचा आरोप काँग्रेस, राष्ट्रवादीच्या नगरसेवकांनी केला. तसेच सांगली जिल्हा परिषदेची सभा ऑफलाइन सुरू होण्याबाबत शासनाचे पत्र आले आहे. त्यामुळे थोड्याच दिवसात पालिकेलाही ऑफलाइन सभेसाठी पत्र येईल, असे मत काँग्रेस नगरसेवक संतोष पाटील यांनी व्यक्त केले.
ऑनलाइन सभा केली तहकूब -
ऑनलाइन सभेत बोलताना सदस्यांना तांत्रिक अडचणी आल्या, त्यामुळे सदस्याला आपल्या विषयांवर मत मांडणे अवघड जात होते. असे मत सर्वपक्षीय सदस्यांनी मांडत ऑनलाइन सभा तहकूब करत शासनाचा निर्णय येऊपर्यंत सभा तहकूब करून ऑनलाइन सभेची मागणी केली. महापौर गीता सुतार यांनी 23 डिसेंबरपर्यंत सभा तहकूब केली.
अन्यथा पुन्हा ऑनलाइन सभा -
विरोधाकांकडून करण्यात आलेल्या आरोपांमध्ये तथ्य नाही. सर्व कारभार पारदर्शीपणे सुरू आहे. सर्वपक्षीय सदस्यांनी ऑनलाइन सभा तहकूब करण्याच्या केलेल्या मागणीनुसार 23 डिसेंबरपर्यंत सभा तहकूब केली आहे. जर यादरम्यान ऑफलाइन सभेबाबत शासनाचे पत्र आले नाही तर, पुन्हा ऑनलाइन सभा घेण्यात येईल,असे महापौर गीता सुतार यांनी स्पष्ट केले.
