सांगली - जिल्हा नियोजन समितीच्या बैठकीला थेट खासदार धैर्यशील माने यांनाच अडवण्यात आल्याचा प्रकार घडला आहे. पोलिसांकडून आत प्रवेश नाकारल्याने प्रवेश दारावरच संतप्त खासदार माने आणि पोलीस अधिकारी यांची शाब्दीक चकमक उडाली.
सांगली जिल्हा नियोजन समितीची बैठक आज (दि. 25 जानेवारी) पालकमंत्री जयंत पाटील यांच्या अध्यक्षतेखाली जिल्हाधिकारी सभागृहात पार पडली. मात्र, या बैठकीला हातकणंगले लोकसभा मतदारसंघाचे शिवसेनेचे खासदार धैर्यशील माने यांना अडवण्यात आल्याचा प्रकार घडला. बैठक सुरू झाल्यानंतर जिल्हाधिकारी कार्यालयातील सभागृहाचे प्रवेशद्वार बंद करण्यात आले. पण, काही वेळानंतर या ठिकाणी खासदार धैर्यशील माने पोहोचले. मात्र, या ठिकाणी असणाऱ्या पोलीस अधिकारी हे माने यांना ओळखत नसल्याने, त्यांनी माने यांना आत जाण्यापासून रोखले. या नंतर खासदार माने हे चांगलेच संतापले.
हेही वाचा - 'कोरेगाव-भीमाप्रकरणी प्रकाश आंबेडकर हेच भिडे आणि एकबोटे यांना वाचवत आहेत'
त्यानंतर आपण खासदार आहोत, मतदारसंघातील लोकांचे प्रश्न मांडण्यासाठी सभागृहात जात आहोत आणि तुम्ही कस अडवता, असा प्रश्न केला. यामुळे पोलीस अधिकारी आणि माने यांच्यात यावेळी शाब्दिक चकमक उडाली. यानंतर या ठिकाणी उपस्थित असणाऱ्या पोलीस अधिकाऱ्यांनी बाजूला जात माने यांना आता प्रवेश दिला. मात्र, खासदार यांनाच बैठकीसाठी जाताना अडवल्याच्या घटनेने कार्यालयाच्या आवारात जोरदार चर्चा रंगली होती.
हेही वाचा - सीएए आणि एनआरसी विरोधात सांगलीमध्ये सर्वपक्षीय मोर्चा
