सांगली - मिरजेतील अपेक्स केअर रुग्णालयातील 87 कोरोना रुग्ण मृत्यू प्रकरणाचे पडसाद सांगली महापालिकेच्या महासभेत उमटले आहेत. आयुक्तांवरील कारवाईच्या मागणीवरून भाजपचे नगरसेवक आणि सत्ताधारी काँग्रेस नगरसेवक यांच्यामध्ये चांगलीच जुंपली. भाजप नगरसेवक धीरज सूर्यवंशी आणि काँग्रेसचे नगरसेवक अभिजित भोसले यांच्यात भरसभेत हमरीतुमरीचा प्रकार घडला.
अपेक्सचे पडसाद महासभेत -
मिरजेच्या अपेक्स केअर कोरोना रुग्णालयातल्या 87 कोरोना रुग्ण मृत्यू प्रकरणाचे पडसाद आज सांगली महापालिकेच्या पार पडलेल्या महासभेत जोरदार उमटले. सुरुवातीला भाजपाने आक्रमक भूमिका घेत आयुक्त आणि आरोग्य अधिकार्‍यांवर कारवाईच्या मागणीसाठी तिरडी मोर्चा काढला होता.
अपेक्स प्रकरणावरून भाजप आणि काँग्रेस नगरसेवक आमनेसामने
या आंदोलनानंतर सुरू असलेल्या महासभेत भाजपा नगरसेवक आणि काँग्रेस नगरसेवकांमध्ये चांगलीच जुंपली. भाजपाचे नगरसेवक व माजी उपमहापौर धीरज सूर्यवंशी यांनी काँग्रेसचे नगरसेवक अभिजीत भोसले यांच्यावर आयुक्तांची पाठराखण करत असल्याचा आरोप केला. यानंतर भाजप नगरसेवक सूर्यवंशी आणि भोसले यांच्यात चांगलीच जुंपली. यावेळी भाजपाचे नगरसेवक धीरज सूर्यवंशी यांनी भोसले यांना एकेरी भाषेचा वापर करत आयुक्तांची बाजू कशासाठी घेत आहेस ? तू अपेक्स हॉस्पिटलमध्ये भागीदार आहेस का ? असा संतप्त सवाल केला. त्यामुळे काही काळ सभागृहांमध्ये तणावाचे वातावरण निर्माण झाले होते. मात्र कॉंग्रेसचे विरोधी पक्षनेते उत्तम साखळकर यांनी मध्यस्थी करत या प्रकरणावर पडदा टाकला.
